Kivu y’Amajyepfo: Abarwanyi byibuze 300 bashyize intwaro hasi

Nibura abarwanyi magana atatu bashyize intwaro hasi muri teritwari enye zo mu ntara ya Kivu y’Amajyepfo, arizo: Kabare, Kalehe, Shabunda na Walungu. Aya makuru yatanzwe mu nama y’intara ku mbogamizi n’icyizere ku ruhare rw’urubyiruko mu kubaka amahoro muri Kivu y’Amajyepfo yabaye ku ya 2 kugeza ku ya 3 Kamena i Bukavu.

Nk’uko bitangazwa na Action pour la paix et la concorde ASBL (APC), uku kwitanga kw’izi nyeshyamba ari umusaruro w’umushinga wayo “Urubyiruko rwiyemeje guharanira amahoro muri Kivu y’Amajyepfo”.

Uyu muryango nk’uko tubikesha Radio Okapi, uvuga ko uyu mushinga wakozwe mu gihe cy’amezi cumi n’umunani, ku nkunga yatanzwe n’Ubunyamabanga bukuru bw’Umuryango w’Abibumbye muri gahunda ya ‘Demobilisation’, kwambura intwaro ndetse no gusubiza mu buzima busanzwe abari abarwanyi (DDRC).

Uyu mushinga uzagera ku musozo ku ya 30 Kamena. Nk’uko umuyobozi wa APC abitangaza ngo washyizwe mu bikorwa muri teritwari zose uko ari enye zo muri Kivu y’Amajyepfo.

Kurikira ibiganiro n’amavidewo binyura kuri Bwiza TV