Kivu y’Amajyepfo: Inyeshyamba 162 zirimo 77 za CNRD zarambitse intwaro

Abarwanyi 162 b’imitwe yitwaje intwaro ikorera muri Teritwari ya Kalehe y’Intara ya Kivu y’Amajyepfo muri Repubulika ya Demukarasi ya Congo barimo aba CNRD Nyatura iyobowe n’uwitwa Machano baherutse kurambika intwaro.

Umuvugizi w’akarere ka gisirikare ka 33, Lt. Col. Jean-Louis Tshimwang yatangarije Actualité dukesha iyi nkuru ko aba barwanyi bishyikirije ingabo za RDC n’iziri mu butumwa bw’amahoro bw’Umuryango w’Abibumbye hagati ya tariki ya 10 na 15 Ukuboza 2021.

Col. Tshimwang yagize ati: “Abarwanyi b’umutwe witwaje intwaro wa Kirikicho bari 35 bafite intwaro 6 za AK-47 n’imwe ya Calibre 12. Hari abarwanyi 77 b’umutwe wa CNRD Nyatura bayobowe na Machano, bazanye n’intwaro 23 za AK-47, ndetse n’abo mu yindi mitwe. Baje nyuma y’ubukangurambaga bwa FARDC na MONUSCO.”

Umutwe wa CNRD Nyatura ntabwo usanzwe ku rutonde ruri muri raporo ya Kivu Security Tracker yasohotse muri uyu mwaka. Gusa bishoboke ko yaba ifitanye isano na CNRD ikomoka kuri FDLR [cyangwa ikaba ari yo].

CNRD ni umutwe urwanya ubutegetsi wari usanzwe ukorera muri Kalehe. Byavuzwe ko usa n’uwasenywe burundu n’ingabo za RDC mu bitero byo kuva mu mpera z’2019 kugeza mu ntangiriro z’2020, byakurikiye koherezwa mu Rwanda kwa benshi bari bawugize, Colonel Wilson Irategeka wari uwuyoboye agapfa.