Ikipe ya Kiyovu Sports itsinze Rayon Sports ibitego 3-2, mu mukino wa kabiri wo mu tsinda rya kabiri wabereye kuri Stade Amahoro i Remera.
Wari umukino w’ishiraniro iyi kipe yo ku Mumena yari yakiriyemo Rayon Sports, nyuma y’uko yaherukaga gutsindwa na Rutsiro ibitego 2-1 mu mukino wari wabereye i Rubavu.
Rayon Sports ni yo yabanje gufungura amazamu ku gitego yatsindiwe na Manasseh Mutatu kuri Coup-Franc yo ku munota wa gatatu w’umukino, gusa iki gitego kiza kwishyurwa ku munota wa 7 ibifashijwemo n’umunya-CamĂ©roun Saba Robert.
Ibi bitego byombi ni byo byajyanye amakipe yombi mu kiruhuko.
Rayon Sports yagarutse mu gice cya kabiri cy’umukino idafite Kevin Muhire wagize ikibazo cy’ivi mu gice cya mbere cy’umukino, bikaba ngombwa ajyanwa kwa muganga.
Iminota ya mbere y’igice cya kabiri yaranzwe no gusatira ku ruhande rwa Kiyovu Sports, ahanini binyuze kuri Nyirinkindi Saleh, Gislain Armel cyo kimwe n’Umurundi Bigirimana Abedi.
Gusatira kwa Kiyovu Sports kwayifashije gutsinda igitego cya kabiri ku munota wa 52 ibifashijwemo na Gislain Armel, gusa Rayon Sports iza kwishyura iki gitego ku munota wa 70 ibifashijwemo na Drissa Dagnogo.
Umurundi Bigirimana Abeddy yahesheje Kiyovu Sports intsinzi ku gitego yatsinze kuri penaliti yo ku munota wa 86 w’umukino, nyuma y’ikosa Herve Rugwiro yari amaze gukorera kuri Gislain Armel.
Rayon Sports yakinnye iminota 15 y’igice cya kabiri cy’umukino ifite abakinnyi 10 mu kibuga bonyine, nyuma y’uko myugariro Niyibizi Emmanuel bita Kibungo yari amaze gukorera ikosa kuri Bigirimana Abedi.
Gutsinda Rayon Sports byatumye Kiyovu Sports igira amanota atatu, mbere y’uko ihura na Gasogi United mu mukino wa gatatu wo mu tsinda.
Rayon Sports yo izahura na Rutsiro kugeza ubu zinganya amanota atatu.
