Ikipe ya Kiyovu Sports yatsinze APR FC yaherukaga gutsinda mu myaka itanu ishize ibitego 2-1, amakipe yombi akomeza kurwanira Igikombe cya shampiyona.
APR FC yari yakiriye Kiyovu Sports kuri Stade ya Kigali i Nyamirambo, mu mukino w’umunsi wa 27 wa shampiyona.
Iminota 45 y’igice cya mbere cy’umukino yarangiye Kiyovu Sports iri imbere n’ibitego 2-0.
APR FC yari yatangiye umukino yotsa igitutu Kiyovu Sports, gusa iyi kipe yo ku Mumena iza kuyigaranzura bigizwemo uruhare n’igitego cyatsinzwe n’Umurundi Bigirimana Abedi.
Ni igitego uyu musore yatsinze kuri Penaliti ku munota wa 15 w’umukino, nyuma y’ikosa myugariro Nsabimana Aimable yari akore k’Umugande Emmanuel Arnold Okwi.
Uyu rutahizamu yatsindiye Kiyovu Sports igitego cya kabiri ku munota wa 29 w’umukino kuri Coup-Franc, mbere yo guhusha uburyo bukomeye bwashoboraga kuvamo igitego cya gatatu ku munota wa 37 w’umukino gusa umupira yateye n’umutwe ugarurwa n’igiti cy’izamu.
APR FC yatangiye igice cya kabiri cy’umukino ikora impinduka zasize Bizimana Yannick na Mugisha Gilbert bahaye umwanya Yves Mugunga na Nshuti Innocent.
Ni impinduka zafashije APR FC gutangira igice cya kabiri cy’umukino isatira Kiyovu Sports.
Iyi kipe y’Ingabo z’igihugu yabonye impozamarira ku munota wa 58 w’umukino ibifashijwemo na Omborenga Fitina. Hari kuri koruneri yari itewe na Djabel Manishimwe birangira umunyezamu Kimenyi Yves ananiwe gufata umupira wahise ugarukira Omborenga awushyira mu izamu.
Iminota yakurikiyeho y’umukino APR FC yahize igitego cyo kwishyura gusa birananirana.
Byabaye ngombwa ko umutoza Mohammed Adil Erradi yongera gukora izindi mpinduka zasize Lague Byiringiro, Ishimwe Anicet na Nsanzimfura Keddy binjiye mu kibuga, gusa izi mpinduka ntizagira icyo zitanga.
Kiyovu Sports yashoboraga kubona ibindi bitego bibiri mu minota ya nyuma y’umukino biciye kuri Okwi na Mugenzi Bienvenu gusa bananirwa kubyaza umusaruro uburyo bukomeye babonye.
Gutsinda uyu mukino byatumye Kiyovu Sports ikiri ku mwanya wa kabiri yuzuza amanota 60 inganya na APR FC ya mbere, gusa bagatandukanywa n’ikinyuranyo cy’igitego kimwe.
Ni mu gihe shampiyona ibura imikino itatu yonyine ikarangira.
