Ku mugabane wa Afurika hakorewe urukingo rwa mbere rwa Covid-19

Ikigo gikora imiti cya Biotech, ishami ryo muri Afurika y’Epfo kuri uyu wa Kane cyatangaje ko cyakoze urukingo rwa mbere rwa Covid-19 rukorewe ku mugabane wa Afurika rwo mu bwoko bwa mRNA ruzatangira kugeragezwa mu Gushyingo.

Umuyobozi w’iki kigo, Petro Terblanche yavuze ko kugerageza uru rukingo ku nyamanswa bizatangira mu kwezi gutaha ariko ku bantu bizakorwe mu Gushyingo 2022.

Iyi nkuru dukesha Ijwi rya Amerika ivuga ko nyuma y’imyaka ibiri Covid-19 yadutse na nyuma y’umwaka hatangiye gutangwa urukingo rwayo, Abanyafurika 11,3% ari bo bonyine bamaze gukingirwa.

Afurika kugeza ubu ikaba igitumiza inkingo yifashisha ku migabane y’u Burayi na Amerika ndetse no mu Bushinwa, aho bivugwa ko iki cyorezo cyatangiriye mu Mujyu wa Huwan.

Ibihugu by’u Rwanda na Senegal nabyo ni bimwe ku mugabane wa Afurika biteganya gukorera inkingo zirimo iza Covid-19 n’izindi ndwara nka Malaria ku mugabane wa Afurika, aho biteganyijwe ko zizatangira gukorwa mu 2024 mu gihe uruganda ruzatangira kubakwa muri Kamena 2022.