Leta ya Ethiopia ivuga ko abasirikare bakuru 12 ba TPLF bishwe, abandi bafatwa mpiri

Leta ya Ethiopia kuri uyu wa 7 Ukuboza 2021 yatangaje ko ingabo zayo zishe abasirikare bakuru b’umutwe witwaje intwaro wa TPLF bagera kuri 12, abandi bafatwa mpiri mu gihe hari n’abakomeje kurambika intwaro.

Mu itangazo ibiro bya Minisitiri w’Intebe byashyize kuri Twitter, byasobanuye ko ibi byose byabereye mu mirwano ingabo za Leta zari zihanganiyemo na TPLF mu cyumweru gishize. Biti: “Muramenyeshwa ko mu cyumweru gishize, abasirikare bakuru bagera kuri 12 ba TPLF bishwe.”

Byakomeje bisobanura ko intambwe ingabo za Leta zateye yo kwigarurira imijyi wa Dessie na Kombolcha ikomeye cyane, ikaba n’igihombo gikomeye kuri TPLF yakwiye imishwaro.

Byaboneyeho gutangaza ko usibye abasirikare ba TPLF bishwe [amazina yabo ntiyatangajwe), hari abandi [batatangarijwe umubare] bafashwe mpiri, abandi bakaba bari kwitaba ijwi rya Minisitiri w’Intebe, Abiy Ahmed ribasaba kurambika intwaro.

Leta ya Ethiopia itangaje ibyo yagezeho mu gihe Umuvugizi wa TPLF, Getachew Reda kuri uyu wa 7 Ukuboza yari yatangaje ko kuba abarwanyi babo bakuwe mu duce twa Dessie na Kombolcha atari uko batsinzwe, ko ahubwo ngo byari mu mugambi wabo kuko batari bahashyize abo kuhabohora.