Minisiteri y’ubuzima ya Uganda kuri uyu wa 20 Nzeri 2022 yatangaje ko muri iki gihugu hongeye kuboneka umurwayi w’icyorezo cya Ebola.
Iyi Minisiteri yasobanuye ko uyu murwayi yabonetse mu karere ka Mubende, ndetse ngo yamaze gupfa. Iti: “Uganda iremeza icyorezo cya Ebola mu karere ka Mubende. Umurwayi wabonetse ni umugabo w’imyaka 24 y’amavuko. Yagaragaje ibimenyetso, nyuma aza gupfa.”
Nyuma y’isuzuma ryagaragaje ko uyu mugabo yishwe na Ebola, iyi Minisiteri isobobanura ko muri Mubende hoherejwe itsinda ry’abashinzwe ubuzima kugira ngo rifate ibipimo ababa barahuye na we, hagenzurwa niba nta wundi ufite ubwandu.
Ishami ry’umuryango w’Abibumbye ryita ku buzima muri Afurika, WHO Africa, risobanura ko abantu 8 bikekwa ko baba bafite ubwandu bwa Ebola muri Mubende bari kwitabwaho n’abaganga.
Icyorezo cya Ebola cyaherukaga kugaragara muri Uganda mu mwaka w’2019.
