Umunya-Argentine Lionel Messi, yaraye atsinze igitego cya 700 nk’umukinnyi, yinjira mu bakinnyi mbarwa babashije kugeza kuri ibyo bitego mu mateka y’umupira w’amaguru.
Hari mu mukino w’umunsi wa 33 wa Shampiyona ya Espagne FC Barcelona akinira yanganyijemo ibitego 2-2 na Atletico Madrid.
Ni umukino wabonetsemo penaliti eshatu, zirimo ebyiri zahawe Atletico Madrid zikinjizwa na Saùl Niguez, n’iyahawe FC Barcelona mu ntangiriro z’igice cya kabiri cy’umukino ikinjizwa na Lionel Messi.
Kunganya uyu mukino byatumye FC Barcelona isa naho itakaza burundu igikombe cya Shampiyona ya Espagne, dore ko Real Madrid bahanganye ishobora kuyirusha amanota ane mu gihe yaba itsinze Getafe bakina muri iri joro.
Messi wari waratsinze ibitego 699, igitego yatsinze Atletico Madrid cyatumye yuzuza ibitego 700 amaze gutsinda, atera ikirenge mu cya Cristiano Ronaldo wageze kuri uyu muhigo mu Ukwakira umwaka ushize cyo kimwe n’ibindi bihangange bitanu.
Uyu munya-Argentine kandi yuzuzaga igitego cya 630 amaze gutsindira FC Barcelona mu mikino 724 amaze kuyikinira.
Nk’uko bigaragara ku rubuga Rec.Sport.Soccer Statistics Foundation, Lionel Messi ari inyuma y’abandi bakinnyi batsinze hejuru y’ibitego 700 nk’abakinnyi, barimo Cristiano Ronaldo umaze kugeza kuri 726 na Josef Bican ufite inkomoko muri Repubulika ya Czech na Autriche watsinze ibitego 805.
Undi ni Umunya-Brazil Romario watsinze ibitego 772, mu gihe igihangange Pele cyatsinze ibitego 677.
Umunya-Hongria Ferenc Puskas we yatsinze ibitego 746 nk’umukinnyi, na ho Umudage Gerd Muller atsinda ibitego 735.
Uko ibitego 700 Messi yatsinze byinjiye
Ibitego byinshi muri 700 Messi amaze gutsinda yabitsindishije ikirenge cye cy’ibumoso, dore ko cyamutsindiye ibitego 582, mu gihe akaguru ke k’iburyo kamutsindiye ibitego 98 byonyine.
Messi kandi mu bitego amaze gutsinda harimo 24 yatsindishije umutwe.
Messi kandi nk’umuhanga ku mipira y’imiterekano, amaze gutsinda Coup-Franc 52 na penaliti 90. Ibyinshi mu bitego yatsinze yabitsindiye mu rubuga rw’amahina (580), mu gihe 120 byonyine ari byo yatsinze ari hanze yarwo.
