Ikipe ya FC Barcelona yanyagiye Osasuna ibitego 4-0 mu mukino w’umunsi wa 10 wa shampiyona ya Espagne, Kapiteni wayo Lionel Messi atura igitego yatsinze Nyakwigendera Diego Armando Maradona.
Maradona ufatwa nk’umwe mu bakinnyi b’ibihe byose umupira w’amaguru wagize mu mateka yawo, yitabye Imana ku wa Gatatu w’iki cyumweru azize indwara y’umutima, agwa iwabo muri Argentine.
Igitego Messi yamutuye kinjiye ku munota wa 73 w’umukino FC Barcelona yatsinzemo Osasuna, nyuma yo gucenga ba myugariro b’iriya kipe agatera umupira mu izamu ari inyuma gato y’urubuga rw’amahina.
Messi yahise akuramo umwambaro wa FC Barcelona, asigarana uwa Newell’s Old Boys yari yambaye imbere wanditseho nimero 10 Maradona yambaraga.
Iyi Newell’s Old Boys yo mu gihugu cya Argentine ni yo kipe Nyakwigendera Diego Maradona yatangiriyemo gukina umupira w’amaguru nk’uwabigize umwuga.
Messi wahise werekwa ikarita y’umuhondo kubera kiriya gikorwa, yanahise apfukama imbere y’ikimenyetso cy’umwambaro wa Maradona kiri ku kibuga cya Stade ya Camp Nou, amusabira ku Mana.
Umunya Denmark, Martin Braithwaite ni we wari wafunguriye FC Barcelona amazamu ku munota wa 29 w’umukino, Antoine Griezmann yongeramo icya kabiri ku wa 42, mu gihe igitego cya gatatu cyatsinzwe na Philippe Coutinho ku munota wa 57 w’umukino.
Gutsinda Osasuna byafashije FC Barcelona gufata umwanya wa munani muri shampiyona n’amanota 14, mu mikino icyenda ya shampiyona imaze gukina.
