Umuhungu wa Perezida Yoweri Museveni usanzwe ari umugaba w’ingabo za Uganda zirwanira ku butaka, Lt Gen. Muhoozi Kainerugaba, yateguye irushanwa ry’umupira w’amaguru rirahuza ba Generals n’abadepite.
Ni mu rwego rwo kwizihiza isabukuru y’imyaka 48 y’amavuko y’uyu musirikare, yabaye tariki ya 24 Mata 2022.
Nk’uko bigaragara ku itangazo, urutonde rw’abahagararira ingabo za Uganda muri iri rushanwa ruriho abasirikare 23 guhera kuri General kugeza kuri Brigadier General.
Ba Generals na Lieutenant Generals ni: Gen. Wilson Mbasu Mbadi (Umugaba Mukuru w’ingabo za Uganda), Gen. David Muhoozi, Lt Gen. Peter Elwelu, Lt Gen. Kainerugaba, Lt Gen. Charles Lutaaya, Lt Gen. Charles Otema, Lt Gen. James Mugira na Lt Gen. Joseph Musanyufu.
Muri ba Major Generals harimo: Maj. Gen. Leopold Kyanda, Maj. Gen. Geoffrey Katsigazi, Maj. Gen. Kasiita Gowa, Maj. Gen. James Birungi uyobora umutwe w’ingabo kabuhariwe wa SFC, Maj. Gen. Don Nabasa, Maj. Gen. Francis Okello na Maj. Gen. George Igumba.
Muri ba Brigadier Generals harimo: Brig. Gen. Matthew Gureme, Brig. Gen. Bob Ogiki, Brig. Gen. David Gonyi, Brig. Gen. Peter Gaetano Omola, Brig. Gen. Irumba Tingila, Brig. Gen. Julius Biryabarema, Brig. Gen. Joseph Ssemwaga na Brig. Gen. Francis Chemo.
Iri rushanwa rirabera kuri Philip Omondi Stadium i Lugogo muri Kampala kuri uyu wa 29 Mata 2022, saa cyenda z’umugoroba kandi ikipe izatsinda irahabwa igikombe cyahawe izina rya ‘Lt Gen. Muhoozi Kainerugaba Brithday Cup’
Uyu mukino uzakurikira undi uzahuza inshuti 23 za Lt Gen. Kainerugaba zirimo umunyamakuru Andrew Mwenda na Don Wanyama hamwe n’urubyiruko rugishakisha ubuzima rukunze kwitwa ‘Ghetto Youth’. Wo uzatangira saa munani z’igicamunsi, umare isaha imwe.
Iri rushanwa rikurikiye ibirori byo kwizihiza isabukuru ya Lt Gen. Kainerugaba byabereye mu buryo bwa rusange kuri Lugogo Cricket Oval tariki ya 23 Mata, n’ibyo kwiyakira byabereye ku biro by’Umukuru w’Igihugu ku munsi wakurikiyeho.
