Umugore ufite ipeti rya Captain mu Gisirikare cya Repubulika ya Demokarasi ya Congo, Kathy Tshikomb Thérèse, wari ushinzwe gufata amashusho mu ishami rya FARDC rishinzwe itumanaho mu Karere ka 22 ka Gisirikare, yiciwe aho yabaga, mu ijoro ryo ku wa Mbere rishyira ku wa Kabiri, itariki ya 13 Ukwakira 2026, mu Kigo cya Gisirikare cya Vangu, mu Mujyiw a Lubumbashi.
Amakuru yatangajwe n’abatangabuhamya avuga ko abagabo batamenyekanye bageze mu rugo rw’uyu musirikare mukuru mu ijoro.
Nyuma yo gukomanga ku rugi, ngo bakiriwe na Captain Kathy Tshikomb Thérèse mbere yo kwinjira mu rugo rwe.
Nk’uko ayo makuru akomeza avuga, uyu yaba yarakorewe ibikorwa bibi mbere yo guterwa icyuma n’abamuteye, bahise bahunga.
Impamvu nyayo y’ubwo bwicanyi n’uko bwakozwe biracyakorwaho iperereza n’inzego zibishinzwe nk’uko inkuru dukesha Kivu Morning Post ivuga.
Urupfu rwa Captain Kathy Tshikomb Thérèse, ruje nyuma y'urupfu rw’undi witwa Capt. Stany, rwateye kwibaza byinshi kandi hasabwa ko hakorwa iperereza ryimbitse ku mutekano muke ukomeje kugaragara mu Mujyi wa Lubumbashi.
Mu rwego rwo guhangana n’ubwiyongere bw’ubujura, urugomo, n’ibitero byitwaje imbunda byavuzwe mu byumweru bishize, umuyobozi wa polisi y’igihugu mu ntara, Gen. Blaise Kilimbalimba, yatangaje ku wa Mbere ko bagiye gukaza ingamba z’umutekano zo kurwanya ibyaha mu mijyi.
Urupfu rw'uyu musirikare mukuru rero rwazamuye ikibazo ku bijyanye no kurinda abasirikare bakuru n'ingo zabo, harimo n'abari mu nkambi za gisirikare.