Abarwanyi ba M23 kuri uyu wa Kane tariki ya 8 Ukwakira, bavuye mu duce dutandukanye twa teritwari ya Masisi mu ntara ya Kivu y'Amajyaruguru, mu gihe imirwano ikomeye ikomeje kujya mbere hagati y'uyu mutwe n'ihuriro ry'Ingabo zirwana ku ruhande rwa Guverinoma ya Congo Kinshasa.
Amakuru aturuka ku mirongo y'urugamba avuga ko M23 yavuye mu duce turimo Gatoyi, Kawele, Nyakigano na Gasenyi, mbere y'uko dufatwa n'ingabo zirimo FARDC, Wazalendo, FDLR ndetse n'ingabo z'u Burundi.
Amakuru avuga ko M23 yavuye muri tumwe muri turiya duce itarwanye.
Kuri ubu ntibizwi niba M23 yavuye muri turiya duce nk'amayeri ya gisirikare cyangwa niba ari ingaruka zo kurushwa imbaraga n'ingabo bahanganye.
Imirwano hagati ya M23 n'ihuriro ry'Ingabo za Leta ya RDC kandi iravugwa mu duce turimo Gasake na Gashovu, uduce twombi turi ku murongo w'urugamba wa Ngungu kuri ubu tukiri mu maboko y'inyeshyamba.
Imirwano y'impande zombi kandi iranavugwa mu gace ka Runigi gaherereye hafi ya Rubaya.