Abarwanyi b’umutwe wa M23 kuva ku Cyumweru tariki ya 15 Mutarama, bavuye mu duce twinshi bari barigaruriye muri Teritwari ya Rutshuru ho mu ntara ya Kivu y’Amajyaruguru.
Abatuye muri Rutshuru babwiye Radio Okapi ko M23 gusubira inyuma ku ruhande rwa M23 byahereye mu mujyi wa Kiwanja ku mugoroba wo ku Cyumweru, mbere yo gukomereza mu bindi bice kuri uyu wa Mbere.
M23 yasubiye inyuma, nyuma y’uko inama ya Luanda yo mu Ugushyingo 2022 yari yarayihaye itariki ya 15 Mutarama 2023 nka nyirantarengwa yo kuba yamaze kuva mu duce twose yigaruriye hanyuma abarwanyi bayo bagasubira mu birindiro by’uriya mutwe muri Sabyinyo.
Kuri ubu uduce abarwanyi b’uriya mutwe bamaze kuvamo ni Nyamilima, Buramba na Kisharo.
Sosiyete Sivile yo mu ntara ya Kivu y’Amajyaruguru yavuze ko abarwanyi ba M23 nyuma yo kuva mu bice bari barafashe “bamwe berekeje mu majyepfo ya Rutshuru, ni ukuvuga bagannye Burayi ku birometero 2 uvuye i Rutshuru n’i Rubare aho bagaragara cyane.”
Iyi Sosiyete Sivile yavuze ko abandi barwanyi bo berekeje ahitwa Kahunga, mu majyaruguru y’ibice bya Kiwanja-Kanyabayonga; gusa yo n’abaturage bakavuga ko batemera ko M23 yasubiye inyuma bya nyabyo.
Aba bavuga ko ibyakozwe na M23 ari “kuyobya uburari”, bijyanye no kuba itariki ntarengwa yari yahawe yamaze kugera.
Ibindi bice amakuru avuga ko abarwanyi ba M23 bamaze kuvamo n’ibyo muri Chaufferie ya Bwiza aho bavuye berekeza mu bice bya Bishusha na Tongo bivugwa ko hari abarwanyi benshi.
M23 yarekuye turiya duce twose nyuma y’uko mu cyumweru gishize Perezida wayo, Bertrand Bisimwa, yari yakiriwe na Uhuru Kenyatta wahoze ayobora Kenya kuri ubu ufite inshingano zo kuba umuhuza mu bibazo bya Congo.
Mu byo Bisimwa wari kumwe n’abandi bayobozi muri M23 bumvikanye na Kenyatta, harimo kurekura uduce twose tw’intara ya Kivu y’Amajyaruguru uriya mutwe umaze igihe ugenzura.
