Perezida wa Madagascar, Andry Rajoelina, ku cyumweru Tariki ya 12 Nyakanga yatangaje ko babiri mu bagize Inteko Ishinga amategeko y’Igihugu cye barimo umudepite n’umusenateri bapfuye nyuma yo kwandura icyorezo cya Covid-19.
Perezida Rajoelina kandi yatangaje ko uretse abapfuye hari n’abandi badepite 11 n’abasenateri 14 ba Madagascar banduye kiriya cyorezo gihangayikishije Isi.
Muri rusange Madagascar irabarura abaturage 2,573 bamaze kwandura icyorezo cya Virusi ya Corona, mu gihe abamaze guhitanwa na yo ari 35.
Icyorezo cya Covid-19 gikomeje kugarika ingogo muri kiriya gihugu giherereye rwa gati mu nyanja y’Abahinde, mu gihe muri Mata uyu mwaka Perezida wacyo, Andy Rajoelina yatangaje ku mugaragaro ko igihugu cye cyavumbuye umuti wa Covid-19 Organics ukozwe mu byatsi byitwa Artemisia, yahamije ko uvura Covid-19.
Ni umuti wahawe abaturage ba Madagascar ku bwinshi, yemwe unatumizwa n’ibihugu bitandukanye byo ku mugabane wa Afurika kugira ngo ubifashe guhangana na Covid-19.
Mu bihugu byatumije uwo muti harimo Tanzania, ibirwa bya Comores na GuinĂ©e Bissau, gusa kuba imibare y’ubwandu ikomeje kwiyongera muri Madagascar ndetse no mu bihugu bitandukanye byawakiriye ni ikimenyetso simusiga gishimangira ko ushobora kuba ari uwa baringa.
Ishami ry’umuryango w’abibumbye ryita ku buzima, OMS, ryanze kwemeza ko umuti wa Covid-Organics wakozwe na Madagascar uvura Covid-19, bijyanye no kuba nta bihamya bishingiye kuri Siyansi abawukoze bigeze bagaragaza.
Magingo aya kubera ubwiyongere bw’imibare y’ubwandu bwa Covid-19, umurwa mukuru wa Madagascar, Antananarivo washyizwe muri gahunda ya Guma mu rugo ku wa 05 Nyakanga, nyuma y’amezi abiri ingamba zo kwirinda ikwirakwizwa rya kiriya cyorezo zarorohejwe.
