Awamu hii mpya ya mazungumzo imekuja wiki mbili baada ya kutiwa saini kwa makubaliano ya amani huko Washington kati ya Kinshasa na Kigali, huku hali ikiwa tete kwenye uwanja wa mapigano. Hata hivyo, wapatanishi bado wana matumaini.
Wajumbe kutoka serikali ya Jamhuri ya Kidemokrasia ya Kongo na kundi la waasi la AFC/M23 wamewasili Doha, Qatar, mahali ambapo mazungumzo ya amani yaliyokuwa yameanza miezi kadhaa iliyopita yanatarajiwa kuendelea. Kitu kinachotofautisha awamu hii na zilizopita ni kiwango cha uwakilishi.
Kundi hili la kisiasa na kijeshi linalopinga serikali lililopo kwa sasa linawakilishwa na Benjamin Mbonimpa, katibu mkuu anayehudumu pia kama waziri mkuu wa kundi hilo, kwa mujibu wa habari kutoka kwa AFC/M23 zilizoripotiwa na RFI.
Kwa upande wa Kinshasa, majina ya wajumbe bado hayajafichuliwa. Hata hivyo, vyanzo vingi vinathibitisha kuwa baadhi ya waliotia saini makubaliano ya Washington wanahusika katika ujumbe huo.
Mmoja wa wanadiplomasia wanaofuatilia suala hili anaeleza kuwa huu ni wakati muhimu, na mafanikio yatategemea kama pande zote mbili zitazingatia makubaliano yao — ikiwa ni pamoja na kusitisha mapigano, kuwaachilia wafungwa, na mengineyo. Marekani na Qatar wanatoa shinikizo maalum kuhakikisha mafanikio.
Katika upatanisho huu, Doha inashirikiana kwa karibu na washirika wa kikanda ili kuonyesha nafasi ya Afrika katika mchakato huu. Mwanadiplomasia mmoja kutoka Afrika ya Kati alisema: “Qatar haitaki kushindwa.” Ushirikiano huu unalenga kuhakikisha kuwa juhudi zote zinaelekezwa kwenye lengo moja: amani ya kweli na ya kudumu, kama inavyodaiwa na mashirika ya kiraia.
Hata hivyo, hali bado ni ya wasiwasi katika uwanja wa vita. Pande zote bado zina uhasama mkubwa. Ripoti zinasema kuwa AFC/M23 wanasubiri hatua za kujenga imani zichukuliwe kabla ya kuendelea na mazungumzo kwa kina.
Kundi hilo linaendelea kuishutumu serikali ya Kinshasa kwa kuwa na nia ya kuendeleza vita kwa kupeleka wanajeshi na silaha karibu na maeneo waliyodhibiti, wakati serikali ikidai kuwa inaunga mkono juhudi za amani.
