Mu nkuru zidasanzwe zabayeho mu gihe cy’Intambara ya Koreya, imwe mu zikomeye ni iy’umupilote wa Koreya ya Ruguru witwaga No Kum-sok, watorokanye indege y’intambara ya MiG-15 akayigeza muri Koreya y’Epfo mu mwaka wa 1953.
Icyo gikorwa cyahinduye amateka y’ubutasi bwa Amerika mu gihe cy’Intambara y’Ubutita.
Icyo gihe, indege za MiG-15 zari zimaze guteza impungenge Amerika n’abafatanyabikorwa bayo kubera ubushobozi bwazo bwo kurwana mu kirere.
Amerika yari imaze igihe ishaka kubona imwe muri izo ndege imeze neza kugira ngo iyigeho, ndetse yari yaratangaje igihembo cy’amadolari 100,000 ku mupilote wese wari kuyigeza mu maboko yayo.
Ku wa 21 Nzeri 1953, nyuma y’amezi make habaye agahenge mu ntambara ya Koreya, No Kum-sok yafashe icyemezo cyo gutoroka.
Yahagurutse ku kibuga cy’indege cya Sunan hafi ya Pyongyang, aguruka hasi kugira ngo atagaragara kuri radar, maze mu minota 17 gusa aba ageze ku kibuga cya Kimpo hafi ya Seoul muri Koreya y’Epfo.
Kubera amahirwe adasanzwe, radar y’Abanyamerika yari yazimijwe icyo gitondo kubera ibikorwa byo kuyisana, bituma atabonwa mbere yo kugwa.
Igitangaje kurushaho ni uko yinjiye ku kibuga cy’indege aturutse ku ruhande rutari rusanzwe, hafi kugongana n’indege y’Abanyamerika yo mu bwoko bwa F-86 Sabre yari igiye kugwa.
Abasirikare bari ku kibuga babanje gutekereza ko ari imwe mu ndege zabo, nyuma baza gutungurwa no kubona ari MiG-15 ya Koreya ya Ruguru.
Nyuma yo kugwa, No Kum-sok yashyikirijwe inzego z’ubutasi za Amerika.
Icyo gihe ni bwo bwa mbere yamenye ko hari igihembo cy’amadolari 100,000 cyari cyaratangajwe ku muntu wari kuzanira Amerika MiG-15.
Yavuze ko atari azi iyo gahunda, ahubwo ko intego ye yari uguhunga ubutegetsi bwa Koreya ya Ruguru no gushaka ubuzima bwisanzuye.
Amerika yahise itwara iyo ndege muri Okinawa, nyuma iyijyana muri Leta Zunze Ubumwe za Amerika kugira ngo ikorerwe ubushakashatsi bwimbitse.
Ibizamini byakozwe n’abapilote b’ibigerageza byagaragaje imbaraga n’intege nke za MiG-15, bituma Amerika irushaho gusobanukirwa n’uburyo bwo guhangana na yo mu ntambara zo mu kirere.
Ku ruhande rwa No Kum-sok, nyuma yaje kwimukira muri Amerika, ahindura izina rye aba Kenneth Rowe. Yaje kuba umwenegihugu wa Amerika ndetse akora imyaka myinshi nk’inzobere mu by’ubwubatsi bw’indege.
Impamvu iyi nkuru ikomeje gukurura amatsiko kugeza n’uyu munsi ni uko No Kum-sok yabaye umwe mu bantu bake cyane batorokanye ibanga rikomeye rya gisirikare ry’igihugu cyabo bakarigeza ku ruhande rwari bahanganye.
Gutoroka kwe kwahaye Amerika amakuru y’ingenzi ku bushobozi bwa MiG-15, biba intsinzi ikomeye mu rugamba rw’ubutasi rwaranze Intambara y’Ubutita.
Nyuma y’imyaka myinshi, inkuru ya No Kum-sok iracyafatwa nk’imwe mu nkuru zitangaje z’ubuhunzi bwa gisirikare n’ubutasi bwabayeho mu kinyejana cya 20.
