Ku wa kabiri, Misiri yagejeje imfashanyo zayo za gisirikare za mbere muri Somaliya mu myaka irenga mirongo ine ishize, nk’uko byemejwe n’abadipolomate batatu na bamwe mu bagize Guverinoma ya Somaliya, igikorwa ngo gishobora kongera umwuka mubi hagati y’ibihugu byombi na Ethiopia.
Muri uyu mwaka, Misiri na Somaliya byarushijeho kwiyegerezanya nyuma y’uko Ethiopia isinyanye amasezerano y’ibanze n’akarere kiyomoye kuri Somalia ka Somaliland, yo gukodesha ubutaka ku nyanja ku ngurane yo kwemerwa ku mugaragaro nk’igihugu kigenga.
Guverinoma ya Mogadishu yavuze ko aya masezerano ari igitero ku busugire bwayo kandi ivuga ko izayahagarika mu nzira zose zishoboka.
Igihugu cya Misiri, kimaze imyaka kitavuga rumwe na Ethiopia kubera urugomero runini rw’amashanyarazi Addis Abeba yubatse ku ruzi rwa Nil, nacyo cyamaganye amasezerano ya Somaliland. Misiri yasinyanye amasezerano y’umutekano na Mogadishu mu ntangiriro z’uku kwezi kandi yemeye kohereza ingabo mu butumwa bushya bwo kubungabunga amahoro muri Somaliya nk’uko iyi nkuru dukesha Reuters ikomeza ivuga.
Somaliya yabanje gutera ubwoba ko izirukana ingabo za Ethiopia zigera ku 10,000, zihari mu rwego rwo kubungabunga amahoro ndetse no mu masezerano y’ibihugu byombi yo kurwanya abarwanyi ba al Shabaab, niba ayo masezerano adahagaritswe.
Ku wa kabiri mu gitondo, indege ebyiri za gisirikare zo mu Misiri zageze ku kibuga cy’indege cya Mogadishu zikoreye intwaro n’amasasu, nk’uko abadipolomate babiri n’umuyobozi mukuru muri Somaliya babitangarije Reuters, ariko batifuje ko amazina yabo atangazwa.
Video yashyizwe ku mbuga nkoranyambaga kandi ikagenzurwa na Reuters yerekanaga indege ziri ku kibuga cy’indege.
Umwe mu badipolomate yavuze ko Somaliya “ikina n’umuriro” itumiza intwaro za Misiri no gushaka guhangana na Ethiopia.
Minisiteri z’ububanyi n’amahanga za Somaliya na Misiri ntabwo zahise zisubiza ibyifuzo byo gutanga ibisobanuro.
Icyifuzo cya Misiri cyo gutanga ingabo mu butumwa bushya bwo kubungabunga amahoro buzatangira umwaka utaha muri Somaliya cyatangajwe mu itangazo ry’Umuryango wa Afurika Yunze Ubumwe mu ntangiriro z’uku kwezi. Cairo ntacyo iravuga kuri iki kibazo ku mugaragaro.
