Urukiko rukuru mu Bwongereza kuri uyu wa 10 Kamena 2022 rurumva ikirego cy’imiryango ibiri ishaka kuburizamo iyoherezwa ry’abimukira mu Rwanda riteganyijwe mu cyumweru gitaha.
Nk’uko Sky ibisobanura, iyi miryango ni Detention Action na Care4Calais. Yemeza ko amasezerano guverinoma y’u Bwongereza yagiranye n’iy’u Rwanda muri Mata 2022 atubahiriza uburenganzira bw’aba bimukira kuko ngo ashyira ubuzima bwabo mu kaga.
Care4Calais ivuga ko ifite amakuru y’uko abimukira bazoherezwa ku ikubitiro bakabakaba 100 barimo: 9 bakomoka muri Afghanistan, 35 bo muri Sudan, 18 bo muri Syria, 14 bo muri Iran, 11 bo mu Misiri, uwo muri Iraq, Pakistan, Albania, Algeria, Chad, Eritrea, Turukiya na Vietnam.
Umuyobozi w’uyu muryango, Clare Moseley, yasobanuye ko aba bose bavuganye, bamubwira ko bagiye koherezwa. Ati: “Twavuganye n’abakabakaba 100 bafunzwe, babwiwe ko bazoherezwa ku ngufu mu Rwanda. Hafi ya bose baramanjiriwe kandi bacitse intege.”
Moseley yizera ko urukiko rukuru nirumara kumva ibisobanuro ku kirego cyabo, ruraburizamo igikorwa cyo kohereza aba bimukira yemeza ko bahungiye mu Bwongereza bazi ko bazafatwa neza.
Guverinoma y’u Bwongereza ibinyujije mu biro bya Minisitiri w’Intebe, Boris Johnson, n’iby’Umunyamabanga ushinzwe umutekano w’imbere, Priti Patel, yasobanuye ko n’ubwo yiteze inzitizi z’amategeko, izatsinda, yemerewe kohereza aba bimukira kuko mu Rwanda bazoherezwamo bazitabwaho.
Tariki ya 14 Kamena 2022 ni bwo indege ya mbere izavana abimukira mu Bwongereza ibajyana mu Rwanda izahaguruka, mu gihe haba nta gihindutse.
