Ikipe ya Rayon Sports ibifashijwemo na rutahizamu Mugisha Gilbert, yegukanye amanota atatu nyuma yo gutsinda Bugesera ibitego 3-1.
Hari mu mukino w’umunsi wa kabiri w’amakipe ahatanira igikombe cya shampiyona Rayon Sports yari yakiriyemo Bugesera i Nyamata.
Ni Rayon Sports yari yitwaye nabi ku munsi wa mbere itsindwa na AS Kigali ibitego 3-1, mu gihe Bugesera yari yatsinze Police FC ibitego 2-1.
Bugesera FC ni yo yafunguye amazamu mbere ku gitego cyo ku munota wa 34 cya Rucogoza Djihad, mbere y’uko Manasse Mutatu akishyura ku munota wa 45 w’umukino.
Bugesera FC yari hejuru ya Rayon Sports mu gice cya mbere yahushije uburyo buremereye, burimo imitambiko ibiri yo mu minota itandatu ya mbere y’umukino, yaje ikurikira uburyo bukomeye Sugira Ernest yari amaze guhusha ari wenyine imbere y’izamu.
Bugesera FC binyuje ku basore nka Djihad n’abarimo Kwitonda Alain Baraka, yatangiye igice cya kabiri cy’umukino nanone isatira, gusa iza gukomwa mu nkokora n’igitego cyo ku munota wa 64 w’umukino cya Mugisha Gilbert wari uhawe umupira mwiza na Blaise Nishimwe.
Ni Gilbert wari wagiriwe icyizere cyo kubanza mu kibuga, nyuma y’igihe kirekire yarashyizwe ku ntebe n’umutoza Guy Bukassa.
Mugisha Gilbert yashimangiye intsinzi ya Rayon Sports ayitsindira igitego cya gatatu ku munota wa 79 w’umukino.
Amanota atatu Rayon Sports yakuye kuri Bugesera yatumye igira amanota 3, isigara irushwa inota rimwe na AS Kigali na APR FC za mbere.
Mu wundi mukino, ikipe ya Police FC yatsinze Marines FC ibitego 2-1.
Mu mikino y’amakipe aharanira kutamanuka; Kiyovu Sports yanyagiye Mukura VS ibitego 3-0, Musanze FC yo itsinda AS Muhanga 3-1, mu gihe Etincelles FC yatsinze Sunrise ibitego 2-1.
