Myugariro Kurt Zouma ukinira Ikipe ya West Ham United yo mu Bwongereza, ari mu mazi abira azira guhohotera injangwe y’iwe mu rugo.
Mu ntangiriro z’iki cyumweru ni bwo hagiye ahagaragara amashusho y’uyu myugariro w’Umufaransa akubita imigeri iriya njangwe, nyuma yo kumena aka vase [akabindi bashyiramo indabo].
Ni amashusho yafashwe n’umuvandimwe w’uriya mukinnyi witwa Yoan, mbere yo kujya hanze akamagamirwa kure n’abatari bake bamusabiye gufungwa.
Kugeza ejo ku wa Gatatu abarenga 160,000 bari bamaze gusinya inzandiko zisabira uriya mukinnyi kugezwa imbere y’ubutabera.
Bijyanye n’uburemere bw’amakosa Kurt Zouma yakoze, uruganda rwa Adidas rwahise rusesa amasezerano rwari rufitanye na we yo kurwamamaza.
Adidas yasheshe amasezerano n’uriya mukinnyi nyuma y’uko Ikipe ya West Ham itangaje ko yamuciye amande y’abarirwa muri £ 250,000 (Arenga Frw miliyoni 250) kubera igikorwa yakoze.
West Ham mu itangazo yasohoye, yavuze ko aya mafaranga angana n’umushahara w’ibyumweru bibiri w’uriya mukinnyi agomba guhabwa Umuryango ushinzwe kurengera inyamaswa wahise unatwara iriya njangwe yahohotewe.
West Ham yaciye uriya mukinnyi amande nyuma yo kubwirwa na Company ya Vitality isanzwe iyitera inkunga ko amasezerano bafitanye aseswa mu gihe umutoza David Moyes yaba akinishije uriya mukinnyi mu mukino wa Premier league yatsinzemo Watford igitego 1-0.
Kuri ubu amakuru avuga ko Kurt Zouma uretse gucibwa ariya mande, ashobora no gukatirwa imyaka ine y’igifungo ndetse akanacibwa ihazabu y’arenga Frw miliyoni 50 azira iriya njangwe.
