Umuryango NATO watangaje ko winjije Finland mu myitozo y’igisirikare ikaze ingabo z’ibihugu biwugize bikomeje ku mugabane w’Uburayi, Sweden na yo ikaba izinjiramo vuba.
Muri Finland hari kubera imyitozo yahawe izina rya ‘Arrow 22’ yitabirwa n’ingabo za USA, iz’u Bwongereza, Estonia na Latvia, irimo ibikoresho nk’ibifaru bya Chalenger n’imodoka za Stryker.
Hari imyitozo ibiri ya ‘Defender Europe’ na ‘Swift Response’ yitabirwa n’ingabo zigera ku 18,000 zituruka mu bihugu 20, iri kubera muri Poland no mu bindi bihugu 8.
Ingabo ziri muri iyi myitozo ziri gukoresha imitaka (parachutes) n’indege za kajugujugu zigaba ibitero, iri kubera by’umwihariko muri North Macedonia.
Hari indi ya ‘Wettiner Heider’ yitabirwa n’abasirikare 7,500 mu Budage, ibera mu nyanja ya Mediterane irimo ubwato bwa Harry S. Trauman bwikorera ibikoresho bya gisirikare.
Mu kwezi gutaha, muri Poland no mu bihugu bya Baltic hazabera indi myitozo yahawe izina rya ‘Ramstein Legacy’ izibanda ku mirwanire yo mu kirere n’uburinzi bwa za misile, izitabirwa n’ingabo zo mu bihugu 23.
Muri Estonia, biteganyijwe ko mu gihe cya vuba harabera imyitozo y’ingabo 15,000 zo mu bihugu 14 yahawe izina rya ‘Hedgehog’, ikaba ari imwe mu myitozo yagutse izabera mu gihugu kuva mu 1991. Hazifashishwa ibikoresho birimo ubwato bw’intambara bwa USA buzwi nka Kearsange.
Hazakurikiraho indi myitozo yahawe izina rya ‘Iron Wolf’ izabera muri Lithuania. Izitabirwa n’ingabo 3,000, zizifashisha imodoka zigera ku 1,000 zirimo ibifaru bya Leopard byo mu Budage.
Umuvugizi wa NATO, Oana Lungescu, yasobanuye ko iyi myitozo igamije gukomeza ubushobozi bw’ingabo z’ibihugu ziyigize ku buryo zashobora guhangana n’umwanzi. Ikindi ngo ni uko yari yarayiteganyije mbere y’uko ingabo z’u Burusiya zishoza intambara kuri Ukraine, ashimangira ko ikurikije amategeko mpuzamahanga.
NATO yemeje ko mu byumweru biri imbere, ingabo za Finland zisanzwe ziri muri Arrow 22 n’iza Sweden, ziziyunga n’ingabo z’ibihugu biyigize mu myitozo itandukanye.
Finland na Sweden NATO yita abafatanyabikorwa biherutse gutangaza ko bifite umugambi wo gusaba kwinjira muri uyu muryango bidatinze, kandi bimwe mu bihugu bikomeye biwugize nka USA n’u Bwongereza bishyigikiye iki gitekerezo.
