Kuri uyu wa Kabiri, uwahoze ari Perezida w’u Bufaransa, Nicolas Sarkozy, yitabye urukiko, ahakana amakosa ashinjwa ndetse anagaragariza uburakari ubushinjacyaha ubwo yaburanishwaga kubera inkunga yaba yaratewe mu buryo butemewe n’amategeko n’uko yatsinze amatora yo mu mwaka wa 2012.
Sarkozy, ufite imyaka 66, akurikiranweho kuba yarakoresheje hafi inshuro zikubye ebyiri miliyoni 22.5 z’amayero (miliyoni 27.5 $) zemewe n’amategeko zigomba gukoreshwa mu kwiyamamaza ku mwanya wa perezida mu matora yatsinzwemo na Francois Hollande.
Nicolas Sarkozy yitabye kuri uyu wa kabiri bwa mbere mu rubanza rwatangiye ukwezi gushize. Urukiko rwa Paris rurashaka kumenya niba yari azi gahunda y’inyemezabuguzi z’impimbano zakoreshejwe mu guhisha amafaranga yakoreshejwe.
Yabwiye urukiko ati: “Mufite imbere yanyu umuntu ubuzima bwe bwitangiye politiki mu myaka 40”, asobanura uburyo yitabiriye imyigaragambyo irenga 40, kongeraho ibiganiro yagiranye n’ibinyamakuru ndetse na televiziyo hagati ya Gashyantare na Gicurasi 2012 .
Mu jwi ryuje uburakari, nk’uko iyi nkuru dukesha France24 ivuga, Sarkozy yavuze ko afite ubuyobozi bwa politiki muri iki gikorwa cyo kwiyamamaza, ariko ko atagize uruhare mu mitegurire ndetse no mu bijyanye no gushaka ibikoresho byakoreshejwe.
Ashimangira ko nk’uwari ufite inshingano za perezida yari afite ibindi ashyize imbere.
Urubanza rwatangiye mu gihe kitarenze amezi atatu Sarkozy ahamijwe icyaha cya ruswa no gukoresha ububasha bwe nabi mu rundi rubanza yajuririye umwanzuro warwo.
Biteganijwe ko uru rubanza ruzakomeza kugeza ku ya 22 Kamena, umwanzuro ukazatangwa nyuma yaho.
Kurikira ibiganiro n’amavidewo binyura kuri Bwiza TV
