Nsabimana Callixte ‘Sankara’ wahoze ari umuvugizi w’umutwe wa FLN, yasabye Urukiko rw’Ubujurire kumugabanyiriza igihano cy’igifungo cy’imyaka 20 yahawe byibura rukamukatira imyaka itanu.
Sankara yabisabye kuri uyu wa Mbere tariki ya 31 Mutarama, ubwo hakomezaga iburanisha ry’ubujurire mu rubanza ahuriyemo na Paul Rusesabagina n’abandi 19, bakurikiranyweho ibyaha by’iterabwoba bakoze baba mu mitwe ya MRCD/FLN na FDLR/FOCA.
Hari kuburanwa ku ngingo yo kugabanyirizwa igihano kikajya munsi y’igito giteganyirijwe icyaha ku bw’impamvu nyoroshyacyaha.
Ni ingingo ireba abaregwa 12 barimo Nsabimana Callixte ‘Sankara’, Nizeyimana Marc, Nikuzwe Siméon, Ntabanganyimana Joseph, Niyirora Marcel, Iyamuremye Emmanuel, Nsengimana Herman, Kwitonda André, Nshimiyimana Emmanuel, Ndagijimana Jean Chrétien, Hakizimana Théogène na Mukandutiye Angelina.
Nsabimana waherukaga gusaba urukiko kumushyiriramo imiyaga rukamuha igihano gito bijyanye n’uko hari abo bahoze babana muri FLN batanigeze bagezwa imbere y’ubutabera, yongeye kurutakambira kumugabanyiriza igihano kikagera ku myaka itanu, abishingiye ko yaburanye yemera icyaha ndetse ko yanafashije urukiko mu guhagarika bimwe mu bikorwa bibi byagombaga gukorwa mu gihugu.
Mu rubanza rugikomeje yagize ati: “Ndasaba guhamwa singirwe umwere, ariko ngahabwa amahirwe yo gusubira gutaha vuba…”
