Umunya-Caméroun Alexandre Song wakinnye mu bwugarizi bw’amakipe y’ibihangange nka Arsenal yo mu Bwongereza na FC Barcelone yo muri Espagne, ari i Kigali hano mu Rwanda aho we n’ikipe ye bitabiriye umukino wa gicuti bagomba guhuriramo na APR FC.
Nta gihindutse uyu mukino uzabera kuri Stade ya Kigali ku cyumweru nk’uko Radio 10 ibivuga.
Alexandre Song aheruka gusinyira ikipe ya AS Arta Solar yo mu gihugu cya Djibouti, akaba ari yo izipima na APR FC.
Iyi kipe izaba yitegura ikipe ya Al Mokawloon Al Arab Sporting Club yo mu Misiri bazahura mu ijonjora ry’ibanze rya CAF Confederation Cup ku wa 27 Ugushyingo, umunsi APR FC izaba yesuranira na Gor Mahia yo muri Kenya kuri Stade ya Kigali i Nyamirambo, mu ijonjora ry’ibanze rya CAF Champions league.
APR FC imaze gukina imikino icyenda ya gicuti yitegura ikipe ya Gor Mahia bazahura, harimo uwo iheruka gutsindamo Bugesera FC ibitego 3-0.
