Minisitiri w’Uburezi, Dr. Uwamariya Valentine kuri uyu wa 15 Kanama 2020 yaciye amarenga ko amashuri ashobora kudafungura mu bihe bya vuba bitewe n’uko imibare y’abandura icyorezo cya Covid-19 ikomeje kuzamuka.
Minisitiri Uwamariya yavuze ko Guverinoma y’u Rwanda yafunze amashuri imibare ya Covid-19 ikiri hasi gusa uko iminsi yagiye itambuka, imibare y’abandura izamuka, ati: “Ntitwaba twarafunze amashuri indwara itarakomera ngo dufungure imibare yiyongereye.”
Hari impungenge ko abanyeshuri baramutse boherejwe ku ishuri, bashobora kuhahurira n’ibyago byo kwandura nk’uko Minisitiri Uwamariya yabitangaje. Ati: “Duhereye ku bipimo bitangazwa na Minisiteri y’Ubuzima muri iki gihe, ntabwo twizeye ko abana basubiye ku ishuri batagira ibyago byo kwandura iyi ndwara.”
Gufungura amashuri byashoboka mu gihe Abanyarwanda bakubahiriza amabwiriza yo kwirinda iki cyorezo, byagaragara ko nta barwayi bakiboneka, amasomo akongera agasubukurwa nk’uko Minisitiri Uwamariya yakomeje abivuga.
Ati: “Reka twumve ko ifungurwa ry’amashuri riterwa na buri munyarwanda wese kuko abana bajya mu mashuri bari mu miryango yacu bityo twese uyu munsi tubigize ibyacu tukubahiriza amabwiriza kuburyo nta murwayi mushya wa covid19 gufungura amashuri birashoboka.”
Nyuma y’aho umuntu wa mbere yari amaze kugaragaraho icyorezo cya Covid-19 mu Rwanda tariki ya 14 Werurwe 2020, Guverinoma yafashe icyemezo cyo gufunga amashuri, abanyeshuri baracyurwa. Nyuma yaho, imibare yakomeje kuzamuka ku buryo ihindagurika, bikaba bigorana kumenya niba iki cyorezo kizacika vuba.
Kuri uyu wa 14 Kanama 2020, habonetse umubare w’abanduye 93, uyu ukaba ari uwa kabiri munini kuva iki cyorezo cyagera mu Rwanda. Umubare munini cyane wigeze kugaragara mu masaha 24 ni 102.
