Ishami ry’Umuryango w’Abibumbye ryita ku buzima (OMS), ryahamagariye ibihugu kudahagarika ibikorwa byo gukingira abaturage babyo COVID-19, mu gihe ibihugu byinshi bikomeje guhagarika guha abaturage babyo urukingo rwa AstraZeneca.
Ubufaransa n’Ubudage kuri uyu wa Mbere byabaye ibindi bihugu bihagaritse guha abaturage babyo urukingo rwa AstraZeneca rwakozwe na Kaminuza ya Oxford yo mu Bwongereza.
Ni nyuma y’ibindi bihugu byiganjemo ibyo ku mugababe w’u Burayi nka Norvège, Autriche, Denmark, Iceland, Burgarie, Ireland, Romania, Ubuholandi n’Ubutaliyani.
Ibindi bihugu ni Repubulika iharanira Demokarasi ya Congo ya hano ku mugabane wa Afurika na Thailand na Indonesia byo ku mugabane wa Aziya.
Ibihugu byahagaritse ikoreshwa rya AstraZeneca, bihuriza ku kuba uru rukingo ruteza ibibazo byo kuvura kw’amaraso y’abagiye baruhabwa.
OMS kuri uyu wa Mbere yavuze ko akanama kayo ngishwanama karimo gusuzuma amakuru yerekeye ruriya rukingo kandi ko izashyira ahagaragara ibyavuye mu iperereza ryayo vuba, isaba ibihugu gukomeza gukingira.
Umuvugizi wa OMS, Christian Lindmeier yagize ati: “Kuva uyu munsi, nta kimenyetso cyerekana ko ibyabaye biterwa n’uru rukingo kandi ni ngombwa ko gukingira bikomeza kugira ngo dushobore kurokora ubuzima no gukumira indwara ikomeye y’iyi virusi.”
Urukingo rwa AstraZeneca rukomeje gutakarizwa icyizere, ni rwo rukomeje guhabwa abaturage bo mu bihugu bitandukanye ku bwinshi, bijyanye no kuba ari rwo ruhendutse cyane mu zakozwe.
Kurikira ibiganiro n’amavidewo binyura kuri Bwiza TV
