Indege ya Sosiyete Mpuzamahanga ya Pakistan ikora ubwikorezi bwo mu kirere yari itwaye abagenzi babarirwa mu 100, yakoreye impanuka mu gace gatuwe n’abantu benshi gaherereye hafi y’ikibuga cyo mu mujyi wa Karachi mu majyepfo ya Pakistan.
Umuyobozi w’Umujyi wa Karachi, Wassim Akhtar, yatangaje ko uretse kuba iriya ndege yashenye inzu ziri hagati y’eshanu n’esheshatu, abari bayirimo bose bapfuye uretse Abantu babiri bonyine barokotse.
Itangazamakuru ryo muri Pakistan ryatangaje ko Zafar Masud na Muhammad Zubair barokotse iyi mpanuka yabaye kuri uyu wa gatanu bari bicaye mu myanya y’imbere. Leta y’iki gihugu yo yavuze ko iyo ndege yari itwaye abagenzi 91, n’abakozi bayo umunani.
Ntiharamenyekana ikihishe inyuma y’iriya mpanuka, gusa birakekwa ko yatewe n’uko umupilote yabuze controle y’indege, mbere y’uko ihanuka. Ababonye impanuka iba bavuze ko mbere y’uko indege ihanuka yabanje kuzenguruka ikibuga incuro eshatu yabuze ubwagwa.
Minisitiri w’Intebe wa Pakistan, Imran Khan, yavuze ko “yababajwe” n’iriya mpanuka, yizeza iperereza ry’ako kanya ku kiyihishe inyuma.
Iyi mpanuka yabaye nyuma y’iminsi mike Pakistan isubukuye ingendo zo mu kirere, nyuma y’uko zari zarahagaritswe na Guma mu rugo yari yaratewe na Coronavirus.
Impanuka ikomeye y’indege yaherukaga kuba muri Pakistan ni iyahitanye abantu 47 mu myaka ine ishize. Mbere yaho muri 2012 abantu 121 na bwo bari baguye mu mpanuka y’indege yabereye mu gace ka Rawalpindi, mu gihe muri 2010 impanuka y’indege yahitanye abantu 152 muri kiriya gihugu.
