Mu mpera z’iki cyumweru gishize inkongi y’umuriro ikabije yadutse mu isoko rya kijyambere ryo mu mujyi munini wa Pakisitani, Karachi, yibasiye inzu z’ubucuruzi, ihitana byibuze abantu 11.
Kuri uyu wa Mbere, ubushakashatsi bwatangiye gushakisha abantu barenga 60 baburiwe irengero mu gihe abashinzwe gutabara bakuye imirambo myinshi mu nyubako mu ijoro ryakeye.
Inkongi y’umuriro mu nyubako ya Gul Plaza ifite amagorofa atandukanye yatangiye kuwa Gatandatu mu masaha akuze imara amasaha arenga 24 mbere y’uko abashinzwe kuzimya umuriro babasha kuzimya nk’uko iyi nkuru dukesha Deutsche Welle ivuga.
Inzego z’ubutabazi zavuze ko bakiriye telefoni ya mbere ibabwira ko igorofa ryo hasi ririmo gushya saa 10:38 z’ijoro ku isaha yaho (6:38 pm CET) ku wa Gatandatu.
Igihe abashinzwe kuzimya umuriro bahageraga umuriro wari wamaze kugera mu magorofa yo hejuru.
Iryo soko ririmo amaduka agera ku 1.200. Nk’uko byatangajwe na Dr. Abid Jalal Sheikh, umuyobozi mukuru w’ubutabazi muri uyu mujyi, ngo umuriro wanyuze byihuse mu maduka abitse amavuta yo kwisiga, imyenda n’ibikoresho bya pulasitike bituma irushaho gufata intera.
