Perezida Paul Kagame, yishimiye intsinzi ya Golden State Warriors, nyuma y’uko iyi kipe yegukanye igikombe cya shampiyona ya Leta Zunze Ubumwe za Amerika ya Basketball (NBA).
The Warriors begukanye iki gikombe nyuma yo gutsindira Boston Celtics ku kibuga cyayo cya TD Garden amanota 103-90; mu mukino wa gatandatu warangiye mu gitondo cyo kuri uyu wa mbere.
Iyi Golden State Warriors byayisabye akazi gakomeye kugira ngo yegukane iki gikombe cyabaye icya kane itwaye mu myaka umunani ishize, nyuma yo gutangira itsindwa imikino ibiri ya final ya mbere na Boston Celtics gusa bikarangira iyigaranzuye.
Mu rukerera rwo kuri uyu wa Gatanu na bwo Boston Celtics yatangiye iyobora umukino ku buryo yagejeje ku manota 14 Golden State ifite abiri yonyine, gusa na bwo iza kuyigaranzura kugeza itsinze uyu mukino.
Perezida Paul Kagame abinyujije kuri Twitter ye, ni umwe mu bashimishijwe cyane n’iyi kipe ku bwo kwegukana igikombe.
Ati: “Ikipe yanjye Warriors yegukanye shampiyona ya NBA 2022, ndabashimira!”
Perezida Paul Kagame kandi yashimiye Stephen Curry watowe nk’umukinnyi mwiza (MVP) wa ririya rushanwa.
Curry muri uyu mukino yatsinze amanota 34, akora rebounds zirindwi ndetse anatanga imipira irindwi yabyaye amanota.
Igihembo cya MVP uyu mukinnyi yahawe cyahise kiba icya kane yegukanye, kimugira umukinnyi wa gatandatu mu mateka ya NBA ubashije kubigeraho.
Yiyongereye ku barimo LeBron James, Michael Jordan, Magic Johnson, Kareem Abdul-Jabbar na Tim Duncan.
Perezida Kagame mu minsi ishize ubwo yaganiraga n’umunya-Nigeria Masai Ujiri, yagaragaje Stephen Curry nk’umukinnyi wa mbere yihebeye kurusha abandi muri NBA.
Uretse kuba uyu mukinnyi n’ikipe ye batwaye igikombe, bananditse amateka yo kuba ikipe ya kabiri mu mateka ishoboye gutsinda Boston Celtics ku mukino wa nyuma, nyuma ya Los Angeles Lakers yabikoze inshuro eshatu.
