Perezida wa Repubulika, Paul Kagame kuri uyu wa Gatatu, yitabiriye inama idasanzwe y’umugabane wa Afurika n’u Bushinwa yari igamije kureba uko impande zombi zafatanya guhangana n’icyorezo cya Covid-19.
Ni inama yabaye mu buryo bw’ikoranabuhanga, yari iyobowe na Perezida w’u Bushinwa Xi Jinping, uwa Afurika y’Epfo Cyril Ramaphosa unayobora Umuryango wa Afurika yunze ubumwe cyo kimwe n’uwa SĂ©nĂ©gal, Macky Sall uyobora Ihuriro ry’ubufatanye bwa Afurika n’u Bushinwa, FOCAC.
Ni inama yitabiriwe n’abakuru b’ibihugu bitandukanye bya Afurika, barimo Paul Kagame w’u Rwanda, ndetse n’abakuru b’ibihugu bya Kenya, Mali, Repubulika Iharanira Demokarasi ya Congo, Misiri, Zimbabwe na Ethiopia.
Abandi bayitabiriye nk’abayobozi b’uturere tugize umugabane wa Afurika, barimo uwa Madagascar wayitabiriye nk’umuyobozi w’akarere ka Afurika y’Amajyepfo, Chad yitabiriye nk’umunyamuryango w’agace ka Sahel, ndetse n’u Rwanda rwitabiriye nk’igihugu kiyoboye Umuryango wa Afurika y’Iburasirazuba. Ibihugu bya Nigeria, Gabon, Niger, Algeria, Sudani na Libya na byo byitabiriye.
Mu batumirwa b’Imena muri iyi nama harimo Umunyamabanga mukuru w’Umuryango w’Abibumbye, Antonio Gutters na Dr Tedros Adhanom Ghebreyesus uyobora Ishami ry’Umuryango w’Abibumbye ryita ku buzima, OMS.
Bimwe mu byo abitabiriye iriya nama bemeranyije, harimo kuba Ubushinwa buzakomeza kwagura inguzanyo zabwo ku bihugu bimwe na bimwe byiganjemo ibyo ku mugabane wa Afurika.
Perezida w’u Bushinwa, Xi Jinping kandi yavuze ko igihugu cye cyiteguye gushyira imbere ibihugu bya Afurika, mu gihe inkingo z’icyorezo cya Covid-19 zizaba zamaze kuboneka kugira ngo bizungukireho mu ba mbere.
