Amashyaka atavuga rumwe n’ubutegetsi muri Repubulika ya Demukarasi ya Congo yandikiye Perezida Félix Tshisekedi ibaruwa imusaba kwita ku karengane n’ihohoterwa rikorerwa Abanyamulenge batuye muri icyo gihugu.
Abagize amashyaka abiri; ari yo Forces Novatrices pour l’Union et la Solidarité (FONUS) na Rassemblement Congolais pour la Démocratie(RCD) bandikiye Tshisekedi bamusaba kwita ku karengane n’ihohoterwa Abanyamulenge batuye i Mulenge no muri Kivu y’Amajyepfo bakomeje gukorerwa.
Ibaruwa ivuga ko abagize aya mashyaka batewe impungenge n’uditsiko dutegurira imigambi yatwo mibi ku mbuga nkoranyambaga tugamije kugirira nabi no guhohotera Abanyamulenge.
Baragira bati: “Dutewe impungenge n’ubutumwa butambutswa ku mbuga nkoranyambaga n’udutsiko turwanya Abanyamulenge bwatangiye gutambutswa mu byumweru 3 bisihize. Utu dutsiko twibasira Abanyamulenge tuvuga ko atari abaturage ba RDC ari naho bahera bavuga ko bagomba gusubira iwabo mu Rwanda.
Dutewe impungenge n’amagambo yatangajwe na Martin Fayulu uhagarariye abatavugarumwe n’ubutegetsi, yanashimangiwe na Minisitiri w’iterambere ry’Icyaro, bitakwira bavuga ko muri Congo nta bwoko bw’Abanyamulenge bubamo. Ibi bitekerezo by’aba bagabo byagize uruhare mu kongera ihohoterwa rikorerwa abanyamurenge gusa Mwe nta kintu na kimwe mwigeze mubivugaho kandi abaturage b’inzirakarengane bo bakomeje guhohoterwa.”
Abayobora aya mashyaka kandi bakomeje bavuga ko Perezida Tshisekedi yatereye agati mu ryinyo, mu gihe ubwoko bw’Abanyamulenge bukomeje kwibasirwa mu magambo yuzuye urwango avugwa n’abantu bakomeye muri iki gihugu nyamara Leta ntigire ikintu na kimwe ibivugaho.
Abayobozi ba FONUS na RCD basoje ibaruwa yabo basaba ko Perezida Tshisekedi agira icyo akora mu maguru mashya kugirango arinde aba baturage bagize ijanisha rito muri Repubulika ya Demokarasi ya Congo guhohoterwa bya hato na hato.
