Perezida w’Urukiko rw’Ikirenga rwa Zambia, Irene Chirwa Mambilima, yapfiriye i Cairo mu Misiri aho yari ari mu ruzinduko rw’akazi, nk’uko byatangajwe n’umukuru w’igihugu.
Perezida Edgard Lungu wa Zambia yatangaje ko Madamu Mambilima yashizemo umwuka ahagana saa kumi n’imwe z’umugoroba ku cyumweru mu bitaro byigenga i Cairo.
Irene Mambilima wari ufite imyaka 69, yari mu Misiri kuva tariki 10 z’uku kwezi “mu butumwa bw’igihugu kandi yarwaye ari mu mirimo muri icyo gihugu”, nk’uko biri mu itangazo rya Perezida Lungu.
Leta ya Zambia ntabwo yatangajwe uburwayi bwahitanye Madamu Mambilima.
Uyu mudamu yari Perezida w’Urukiko rw’Ikirenga rwa Zambia kuva muri 2015, ubwo yabaga umugore wa mbere ugizwe Perezida w’Urukiko rw’Ikirenga rwa kiriya gihugu.
Uyu mukuru w’ubucamanza apfuye mu gihe Zambia ikiri mu cyunamo cyo gupfusha umukambwe Kenneth Kaunda wabaye Perezida wa mbere w’iki gihugu, nyuma yo guharanira ubwigenge bwacyo.
Mbere yo kugirwa Perezida w’Urukiko rw’Ikirenga, Mambilima yari Perezida wa Komisiyo y’amatora muri Zambia.
Kurikira ibiganiro n’amavidewo binyura kuri Bwiza TV
