Umuntu witwaje imbunda bikekwa ko yakoreshejwe n’ingengabitekerezo y’abahezanguni, yishe abantu batandatu anakomeretsa abandi barenga cumi na babiri mu gitero cyagabwe mu mujyi wa kabiri mugari muri Pologne.
Polisi yavuze ko uwagabye igitero yerekeje ku Rubuga rw’Isoko Rikuru i Krakow, ahantu nyaburanga hazwi cyane, ku gicamunsi cyo ku wa Gatandatu, maze arasa abantu atarobanura.
Abagore bane n’abagabo babiri bishwe. Batatu bari Abanyapolonye, umwe yari Umwongereza naho babiri ntibaramenyekana.
Mu bantu 16 bakomeretse harimo abanyamahanga batanu baturutse muri Austria, u Budage, Portugal, u Burusiya n’u Bwongereza.
Indi mirambo itatu yabonetse ubwo polisi ishinzwe kurwanya iterabwoba yasakaga inzu y'uyu muntu ukekwaho icyaha mu birometero 200 uvuye aho, nk'uko Minisitiri w'Intebe wa Pologne, Donald Tusk, yabitangaje.
Ku mugoroba wo kuwa Gatandatu, abapolisi benshi bitwaje intwaro bashyizwe hirya no hino muri Krakow, ubwo ingamba z'umutekano zari zikomeje kwiyongera mu murwa mukuru wa Warsaw n'ahandi.
Hahise hatangazwa igihe cy'icyunamo i Krakow kugeza ku itariki ya 11 Ugushyingo nk’uko inkuru dukesha BBC ivuga.
Abapolisi babiri nabo bari mu bakomeretse, umwe muri bo arakomereka cyane.
Uwo ukekwaho icyaha, wari witwaje intwaro kandi yambaye imyambaro isa n’iya gisirikare, ni umusore w’Umunyapolonye w’imyaka 25, minisitiri yavuze ko afite imyumvire y’ubutagondwa mu gukunda igihugu cye.
Yatawe muri yombi kandi aracyari mu bitaro nyuma yo kubagwa.
Tusk yavuze ko hari "ibimenyetso bikomeye" byerekana ko abagore babiri n’umugabo umwe basanzwe bapfuye mu rugo rw’uwo ukekwaho icyaha, i Ostrowiec Świętokrzyski, bari abo mu muryango we wa hafi.
Biravugwa ko ari cyo gitero cya mbere cy’iterabwoba kigabwe mu Mujyi wa Krakow kuva Intambara ya 2 y’Isi yose yarangira.