Rayon Sports yegukanye rutahizamu ukomeye wari wavuzwe muri APR FC

Ikipe ya Rayon yatangaje ko yamaze kumvikana na rutahizamu wahise winjira mu mwanya umwe yari isigaje kwandikishamo abakinnyi.

Umuvugizi wa Rayon Sports, Nkurunziza Jean Paul yabwiye Fine FM ko iyi kipe yamaze gusinyisha rutahizamu mushya igisigaye akaba ari ukumwerekana.

Yirinze gutangaza uwo ari we.

Ati: “Umwanya wari usigaye twamaze gusinyisha rutahizamu, hasigaye kumwerekana. Ni ’surprise’, tuzamwerekana igihe kigeze ntabwo ubu namuvuga.”

Amakuru avuga ko rutahizamu iyi kipe ihishiye abakunzi bayo ari Jean Marc Makusu usanzwe akinira ikipe y’Igihugu ya Congo Kinshasa ‘Les Léopards’.

Uyu rutahizamu w’imyaka 30 y’amavuko wakiniye amakipe atandukanye arimo Orlando Pirates yo muri Afurika y’Epfo na AS Vita Club y’iwabo, kuri ubu ari kumwe n’ikipe ya Congo muri Algeria aho yitabiriye CHAN.

Ikipe ya APR FC yamaze gufungurira imiryango abakinnyi b’abanyamahanga mu cyumweru gishize byavugwaga ko na yo yaba imwifuza.

Makusu bivugwa ko ku ikubitiro yasabaga Rayon Sports $9,000 ya Recruitment na $1,500 y’umushahara.

Uyu mukinnyi wanavuzwe muri Young Africans yo muri Tanzania kandi ngo yasabaga Rayon Sports ko yajya imuha agahimbazamusyi ka $400 mu gihe yatsinze igitego na 200 mu gihe yatanze assist.

Ni amafaranga Rayon Sports yananiwe gutanga, gusa nyuma yo gukomeza kumwinginga birangira impande zombi zumvikanye.

Bivugwa ndetse ko hari umwe mu bayobozi Rayon Sports yamaze kohereza muri Algeria kurangizanya n’uriya rutahizamu.

Jean-Marc Makusu agiye kuza muri Rayon Sports yiyongera kuri Héritier Luvumbu wamaze gusinya amasezerano y’amezi atandatu muri iriya kipe.