Ikipe ya Rayon Sports yanganyije na APR FC 0-0, yuzuza umukino wa kane wikurikiranya idatsinda iyi kipe y’Ingabo z’Igihugu.
Rayon Sports yari yakiriye APR FC kuri Stade ya Kigali i Nyamirambo, mu mukino w’umunsi wa 19 wa shampiyona.
Ni umukino iyi kipe yihariyemo igice cya mbere cyawo, gusa inanirwa kurema uburyo bugaragara bw’ibitego.
Uburyo bumwe bugaragara APR FC yabonye biciye kuri Kapiteni Jacques Tuyisenge ntiyashoboye kububyaza umusaruro.
Igice cya kabiri cy’umukino cyaranzwe n’impinduka ku mpande zombi zitagize icyo zimara.
Mu gice cya kabiri cy’umukino amakipe yombi yagiye agerageza kureba uburyo bw’ibitego, gusa habura ikipe yabona igitego mu izamu ry’indi.
Mugisha Gilbert yashoboraga kubonera APR FC igitego gusa ntiyabyaza umusaruro uburyo bukomeye yabonye.
Kunganya uyu mukino byatumye APR FC ikomeza kuyobora shampiyona n’amanota 41, ikaba ikirusha amanota umunani Rayon Sports ya gatatu.
