Ingabo za Repubulika Iharanira Demukarasi ya Congo zitangaza ko mu bitera zimaze iminsi zigaba muri teritwari ya Kalehe mu ntara ya Kivu y’Amagepfo zimaze gufata mpiri abarwanyi bagera kuri 30 b’imitwe irwanya ubutegetsi bw’u Rwanda.
Aba barwanyi ni abo mu mitwe ya FDLR ndetse na CNRD (Congrès National pour la Renaissance Démocratique) bivugwa ko zirukanwe mu birindiro byazo biri muri Ziralo zigahungira muri Pariki ya Kahuzi Biega nk’uko Komanda wa Operasiyo Sokola 2 ihashya imitwe y’inyeshyamba muri iyi ntara, Capt. Dieudonne Kasereka yabihamirije Radio Okapi.
Ibi bitero muri Kalehe bimaze kwimura abaturage barenga 30,000 ndetse amakuru amwe n’amwe aturuka muri iki gihugu avuga ko impunzi na zo zibasirwa. Amakuru aheruka yavugaga ko impunzi zatewemo amabombe agera kuri 50, zimwe zirapfa, izindi zigera ku 20,000 zikwira imishwaro. Zari zikurikiye izindi 10,000 zari zahunze mbere ho gato.
Ingabo za Congo (FARDC) zatangiye kugaba ibi bitero tariki ya 30 Ukwakira 2019 zifite intego yo kurandura burundu imitwe imaze imyaka irenga 20 iyogoje abatuye mu burasirazuba bw’igihugu (muri Kivu zombi). Intwaro FARDC iri kwifashisha ni intoya n’iziremereye harimo ibifaro n’indege z’intambara.
