Minisitiri w’Ubuzima muri Repubulika Iharanira Demukarasi ya Congo, Dr. Eteni Longondo , kuri uyu wa 1 Gicurasi 2020 yatangaje ko gereza ya gisirikare ya Ndolo yagaragayemo imfungwa 45 zanduye icyorezo cya Covid-19.
Mbere iyi gereza yabanje kubonekamo umurwayi umwe, hakurikiraho abandi batatu bagaragaye tariki ya 28 Mata, inzego zibishinzwe zifata umwanzuro wo gupima imfungwa zose uko ari 2000, birangira babonye abanduye 41.
Uyu Minisitiri yagize ati: “Abarwayi 41 bashya ba Coronavirus bemejwe muri Gereza ya Gisirikare ya Ndolo. Twafashe umwanzuro wo gupima imfungwa zose. Biteye inkeke.”
Dr. Eteni mu kiganiro yagiranye na Radio Top Congo, yavuze ko abagaragayeho iki cyorezo (abagaragaje ibimenyetso), bashyirwa mu kato muri iyi gereza. Ngo hazubakwa inzu y’agateganyo ikozwe mu ihema, izashyirwamo ibikoresho nk’ibitanda n’ibindi bikenerwa n’abarwayi b’iki cyorezo.
RDC yagaragayemo umurwayi wa mbere mu ntangiriro za Werurwe 2020. Ubu imaze kugaragaramo abarwayi 572 barimo 31 vapfuye n’abandi 73 bakize.
