Impirimbanyi Ghislain Muhirwa yo mu muryango ‘Lutte Pour Le Changement’ (LUCHA) urwanya ruswa muri Repubulika ya Demokarasi ya Congo, yatawe muri yombi azira ibirego uriya muryango washyize kuri Denise Tshisekedi, Madamu wa Perezida FĂ©lix Antoine Tshisekedi.
LUCHA yashinje umuryango uyobowe na Denise Tshisekedi kunyereza imfashanyo igenewe abagizweho ingaruka n’iruka ry’ikirunga cya Nyiragongo ryabaye muri Gicurasi uyu mwaka, ibyo uwo muryango wahakanye wivuye inyuma.
Ghislain Muhiwa yatawe muri yombi ku cyumweru afatiwe mu mujyi wa Goma ho mu ntara ya Kivu y’Amajyaruguru.
Uyu mugabo yabawe umuntu wa kabiri wo muri LUCHA utawe muri yombi, nyuma ya mugenzi we witwa Parfait Muhani watawe muri yombi mu kwezi gushize kwa Nyakanga azira ibyiswe kubahuka Madamu w’Umukuru w’Igihugu.
RFI yatangaje ko LUCHA ivuga ko Muhiwa yatawe muri yombi ku busabe bw’umwunganizi mu mategeko wa Madamu Denise Tshisekedi, n’ubwo hari abakora mu rwego rw’ubucamanza babwiye iriya Radiyo Mpuzamahanga y’Abafaransa azira kuba muri Kamena yaranze kwitaba urukiko rwa gisirikare rwari rwamuhamagaje.
Ni nyuma y’uko rufashe inshingano z’ubucamanza bwa gisivile ari na yo mpamvu rwamushyiriyeho impapuro zo kumuta muri yombi.
Mu gihe ubushinjacyaha bwa gisirikare bwari bwarabuze Ghislain Muhiwa, mu kwezi gushize bwari bwataye muri yombi mugenzi we Muhani, wamaze gushinjwa guharabikana no kuba mu itsinda ry’abagizi ba nabi.
Umuryango LUCHA wamaganye itabwa muri yombi rya bariya bakozi bawo, uvuga ko ari ukwibasira bikomeye impirimbanyi n’abatavuga rumwe n’ubutegetsi birangwa muri iki gihugu kuva mu mezi macye ashize.
Kurikira ibiganiro n’amavidewo binyura kuri Bwiza TV->https://www.youtube.com/channel/UC_Wx4Sy2IawVLtp5-QMRhnQ]
