Abategetsi ba Repubulika ya Demokarasi ya Congo barekuye Umunyapolonye wari wakatiwe igifungo cya burundu ashinjwa ibikorwa by’ ubutasi nk’uko byemejwe na minisitiri w’ububanyi n’amahanga wa Pologne.
Mariusz Majewski yasubiye mu Burayi, nk’uko Minisitiri w’ububanyi n’amahanga Radek Sikorski yabitangaje kuri X kuwa Kabiri. Bwana Sikorski yashyize ahagaragara amashusho magufi kuri interineti aho bigaragara ko yavuganaga na Majewski kuri telefoni kugira ngo amwifurize ikaze. Ntiyasobanuye aho Majewski yari aherereye neza.
Majewski w’imyaka 52 yafatiwe muri Repubulika ya Demokarasi ya Congo muri Gashyantare nyuma aza kwitaba urukiko rwa gisirikare muri iki gihugu cya Afurika yo hagati ashinjwa ubutasi. Mu cyumweru gishize yakatiwe igifungo cya burundu. Nta bisobanuro birambuye byerekerana aho yari afungiwe ariko byatanzwe.
Nk’uko bimwe mu byaha yaregwaga bivuga ngo « yegereye umurongo w’imbere w’urugamba ari kumwe n’inyeshyamba za Mobondo”, ajya ku murongo w’imbere w’urugamba atabiherewe uburenganzira kandi “afotora ahantu h’ingenzi kandi agakurikirana ibikorwa bya gisirikare rwihishwa ».
Mobondo ni umutwe witwaje intwaro ushinjwa kugira uruhare mu makimbirane ashingiye ku moko akunze kugaragara mu majyepfo y’uburengerazuba bwa Repubulika ya Demokarasi ya Congo kuva mu 2022 nk’uko iyi nkuru dukesha Africanews ikomeza ivuga.
Minisiteri y’ububanyi n’amahanga ya Pologne ivuga ko Majewski yari umwere. Mu cyumweru gishize, Perezida Andrzej Duda yavuganye kuri telefoni na Perezida wa Congo, Félix Tshisekedi, ngo baganire uko Majewski yarekurwa na cyane ko Pologne nta ambasade igira muri RDC.
Mu cyumweru gishize, umuvugizi wa Minisiteri y’ububanyi n’amahanga ya Pologne, Paweł Wroński, yari yatangaje, nta bisobanuro birambuye, ko Majewski “atari intasi, ahubwo ari umwe mu bagize club y’abantu bakunda gukora ingendo. Wroński yavuze ko “imyitwarire ye yaturutse ku bumenyi buke bw’imico yaho.”
Mu ntangiriro z’uku kwezi, Ingabo za Congo zavuze ko zaburijemo umugambi wo guhirika ubutegetsi kandi zifata ababikoze, bamwe muri bo bakaba ari abanyamahanga. Abantu benshi bafite ubwenegihugu bwa Amerika bari mu bafashwe.
