Umugabo wo mu Karere ka Musanse wavugaga ko avura indwara ya Coronavirus ari mu maboko y’Urwego rw’Igihugu rw’Ubuenzacyaha (RUB) kuva ku wa kabiri tariki 17 Werurwe uyu mwaka.
Ubu butumwa bw’uwafashwe buvuga ko avura Coronavirus bwacicikanye kuri YouTube mu buryo bw’amashusho. Uyu mugabo yavugaga ko asanzwe ari “umuvuzi gakondo” kandi afite umuti uvura icyorezo cya coronavirus.
Aya mashusho yari amaze kurebwa inshuro zibarirwa mu bihumbi kugeza ku wa kabiri mu gitondo, kuva ejo yagizwe umwihariko aho atabonwa na bose uretse uwayashyizeho.
Bwa mbere hageragejwe urukingo rwa coronavirus ku bantu.
Umuvugizi wa RIB, Marie Michelle Umuhoza, yabwiye BBC ko uyu mugabo yafashwe agafungwa. Yagize ati: “Ni byo yatawe muri yombi, akekwaho icyaha cyo gukwirakwiza ibihuha no kwihesha ikintu cy’undi hakoreshejwe uburiganya.”
Umuhoza avuga ko ubu hari gukorwa iperereza ku byaha uyu mugabo aregwa. Michelle avuga ko uru rwego rugenza ibyaha mu Rwanda rutazihanganira abantu bose bashobora gukora ibyaha bitwaje iki cyorezo.
Ishami ry’umuryango w’abibumbye ryita ku buzima OMS (WHO) riburira abantu kwirinda amakuru adatanzwe n’inzego z’ubuvuzi zizewe muri iki gihe cy’icyorezo cya coronavirus.
Covid-19 ni imwe mu bwoko bwa virus zisanzwe zizwi ziswe coronavirus, iyi virus nta muti cyangwa urukingo rwayo biraboneka.
Ibimenyetso byayo ni inkorora, umuriro no guhumeka bigoranye, abaganga bavura ibi bimenyetso kugeza iyi virus ishize mu mubiri w’umuntu.
Abagera kuri 80% by’abayandura bashobora kuyikira nk’uko OMS ibivuga.
