Abari abayobozi baregwa inyandiko mpimbano mu rubanza rw’Ibagiro rya Kijyambere rya Koperative KOADU (Dukunde Umurimo), bari basabye ko barekurwa bakaburana bari hanze. Urukiko rukaba rwanze kubarekura ku mpamvu z’uko baregwa ibyaha bikomeye.
Urubanza ruregwamo abahoze ari abayobozi ba koperative KOADU n’abahoze ari abayobozi ba kompanyi ya CIKOSEKA ari nayo yubatse icyiciro cya kabiri cy’ibagiro rya kijyambere, kuwa kabiri tariki 18.11.2019 bari basabye ko urukiko rwabarekura bakaburana bari hanze, urukiko rwisumbuye rwa Rubavu rukaba rwanze kubarekura kubera ko babanje gushyirirwaho impapuro zibafata kuko bari batakigaragara aho bari batuye.
Umucamanza yakomeje avuga ko muri aba baregwa harimo babiri bafunzwe aribo Mbanjimbere Faustin wahoze ayobora koperative na Rwango Jean Claude wari umunyambanga, urukiko rwanzuye ko batafungurwa ahubwo ko bakomeza gufangwa by’agateganyo kuko bigaragara ko bagenzi babo batatu batagaragara ntibanagaragaze impamvu bataboneka mu gihe nabo bakabaye bafunzwe bikekwa ko baba baratorotse ubutabera. iyi ikaba ari impamvu ituma batarekurwa kuko hari impunkenge z’uko batoroka.
Aba bafunzwe, kuwa mbere bari basabye ko bafungurwa bakaburana bari hanze ariko bagatanga ingwate y’amafaranga cyangwa imitungo itimukanwa. Aba bose uko ari batanu baregwa n’ubushinjacyaha guhimba inyandiko mpimbano ari nayo ntandaro y’ideni ryishyuzwa koperative KOADU ya miliyoni 435.
Ababurana ubwo bari imbere y’inteko iburanisha
Iburanisha ryo kuwa 18/11/2019 ntiryagaragayemo Hakizimana Hassan na Nzabandora Théogène bahagarariye kompanyi ya CIKOSEKA bakaba n’abanyamuryango ba KOADU, bashinjwa uruhare mu gufatanya n’abayobozi guhimba inyandiko mpimbano yemezaga umwenda wa miliyoni 435 Frw ndetse na Noteri w’Umurenge wa Rubavu, Hamuli Bahati wemeje izi nyandiko. Ubushinjacyaha bwavuze ko bashobora kuba baratorotse.
Nyuma yo kubura kwabo mu rubanza hanzuwe ko rusubikwa, rukazasubukurwa tariki 23/12/2019 ari nabwo ruzaburanwa mu mizi , Umushinjacyaha kuwa mbere yasabye ko bakomeza kuburana bafunzwe kuko na bagenzi babo batitabye bigaragara ko batorotse nabo barekuwe bashobora gutoroka.
Umuyobozi wa KOADU, Musabyimana Nyarubisi Bertin, yishimiye umwanzuro w’urukiko wo guhamagaza abatabonetse mu rubanza. Ati “Ni byiza kuba na bo batumijwe ngo bazaboneke mu rubanza, urukiko rukaba rutanarekuye aba basabaga kurekurwa kuko twari dufite impunkenge zuko bashobora gutoroka bagasanga bagenzi babo iyo bagiye.”
Koperative KOADU yashinzwe mu 2009, igamije gukora ububazi bw’inka. Mu 2012 ni bwo yatangiye kubaka ibagiro ryagombaga kurangira mu 2015 biza kugaragaramo ibibazo ku buryo mu 2016 ari bwo Ikigo cy’Igihugu gishinzwe Amakoperative (RCA) yahagaritse Komite yayiyoboraga nyuma yo gutahura uburiganya mu masoko yatangwaga mu myubakire ari nabwo imanza zatangiye kugeza magingo aya.
Abantu bari bitabiriye ari benshi
Umunyamakuru wa bwiza.com-Rubavu
