Rusesabagina yibasiye Perezida Kagame nyuma yo kumuha imbabazi

Umunyapolitiki Paul Rusesabagina yibasiye Perezida Paul Kagame ndetse n’ubutegetsi bw’u Rwanda, nyuma y’igihe gito afunguwe ku mbabazi ze.

Ni mu butumwa bw’amashusho uyu mugabo yashyize hanze kuri uyu wa Gatandatu tariki ya 01 Nyakanga 2023.

Muri Werurwe uyu mwaka ni bwo Rusesabagina wari warakatiwe imyaka 25 y’igifungo nyuma yo guhamywa ibyaha by’iterabwoba yarekuwe ku mbabazi za Perezida Kagame, mbere yo gusubira muri Leta Zunze Ubumwe za Amerika aho atuwe.

Mbere yo kurekurwa yari yandikiye Umukuru w’Igihugu agaragaza ko yicuza kubera ibitero inyeshyamba za FLN z’impuzamashyaka ya MRCD abereye umuyobozi zagabye mu Rwanda, bikicirwamo abaturage.

Ati: “Ibikorwa byanjye muri MRCD byaba byaragize mu bugizi bwa nabi bwakozwe na FLN. Mbere na mbere, ntabwo nshyigikira ubugizi bwa nabi. Ubugizi bwa nabi nta na rimwe bwemewe, haba no mu kubukoresha ngo ugere ku ntego za politiki”.

Icyo gihe yunzemo ko naramuka ahawe imbabazi azamara igihe asigaje cy’ubuzima bwe muri Leta Zunze Ubumwe za Amerika atuje, ndetse ko atazigera yongera kugira aho ahurira na politiki y’u Rwanda.

Ati: “Ibibazo bijyanye na politiki y’u Rwanda nzabisiga inyuma yanjye.”

Nyuma y’amezi atatu Paul Rusesabagina afunguwe, yumvikanye anenga cyane Umukuru w’Igihugu n’ubutegetsi akuriye.

Ni Rusesabagina watangiye ashimira cyane abarimo Leta Zunze Ubumwe za Amerika, Umuryango w’Ubumwe bw’u Burayi ndetse n’abandi bantu batandukanye bagize uruhare mu ifungurwa rye, nyuma y’iminsi 939 avuga ko yari amaze “ikuzimu muri gereza yo mu Rwanda.”

Rusesabagina uvuga ko yaharaniye uburenganzira bwa kiremwa muntu bw’Abanyarwanda na demokarasi ubuzima bwe bwose, avuga ko kuri ubu “u Rwanda ruyobowe n’ubutegetsi bw’igitugu budaha uburenganzira abaturage bacyo, kandi butihanganira uwo ari we wese utavuga rumwe na bwo.”

Rusesabagina yashinje Guverinoma y’u Rwanda kuba yaragerageje kumucecekesha binyuze mu nziza za Politiki, kumugendaho ndetse no kumuhohotera kuva muri 2004 ubwo filime mbarankuru ya Hotel Rwanda yasohokaga, ndetse na nyuma y’Ugushyingo 2005 ubwo yambikwaga umudari w’ishimwe na George W. Bush wari Perezida wa Leta Zunze Ubumwe za Amerika.

U Rwanda rwakunze kugaragaza ko inkuru y’uko Rusesabagina yarokoye Abatutsi bari barahungiye muri Hoteli Mille Collines mu gihe cya Jenoside yakorewe Abatutsi ari ibinyoma.

Bitandukanye n’ibyo yanditse asaba imbabazi, Rusesabagina yashinje Leta y’u Rwanda kumushimuta muri Kanama 2020, ikamukorera iyicarubozo ndetse no kumufunga, kandi ko akurikiranweho “ibinyoma bidafite aho bihuriye nanjye.”

Yavuze ko yahisemo kutitabira urubanza rwe “kuko byagaragaraga ko umwanzuro warwo wari waracuzwe mbere y’uko ruba.”

Yunzemo ati: “Nk’uko byari byitezwe nahamijwe icyaha, nkatirwa imyaka 25 y’igifungo muri imwe muri gereza mbi cyane ku Isi, ikuzimu.”

Rusesabagina yashinje Perezida Kagame n’ubutegetsi bw’ishyaka FPR Inkotanyi kugerageza uko bashoboye kugira ngo bamucecekeshe burundu.

Yavuze ko abagize ubutegetsi bw’u Rwanda “barashimuta, bakora iyicarubozo, bafungira ibinyoma, barica kandi kandi bahimba imanza ziteye isoni ku bantu bose batavuga rumwe na bo.”

Ku bwa Rusesabagina, kuba atarishwe ngo ni amahirwe yagize, bijyanye no kuba “buri mwaka abantu ibihumbi bahura n’ikibazo” nk’icye.

Uyu mugabo uvuga ko ibibera mu Rwanda bimeze nk’ibyaberaga muri Afurika y’Epfo mu gihe cya ‘apartheid’, yavuze ko igihe kigeze ngo abo avuga ko bamurokoye n’abandi avuga ko bafungiye mu bihome bitandukanye ndetse n’abandi bo hirya no hino ku Isi batagira uruvugiro.