Serikali ya Rwanda imetangaza kuwa imejiondoa rasmi katika Jumuiya ya Kiuchumi ya Nchi za Afrika ya Kati (CEEAC), ikishutumu Jamhuri ya Kidemokrasia ya Kongo (DRC) kwa kuitumia jumuiya hiyo kwa maslahi yake binafsi kwa msaada wa baadhi ya nchi wanachama.
Taarifa hiyo imetolewa na Wizara ya Mambo ya Nje ya Rwanda.
Taarifa hiyo ilisomeka:
“Rwanda imeumizwa na jinsi CEEAC inavyotumiwa na DRC kwa msaada wa baadhi ya nchi wanachama kwa manufaa ya kisiasa.”
Rwanda ilisema kuwa hali hiyo ilijitokeza tena jijini Malabo, Guinea ya Ikweta, katika mkutano wa 26 wa kawaida wa viongozi wa nchi wanachama uliofanyika Jumamosi.
Rwanda, kupitia Waziri Mkuu Dkt. Edouard Ngirente, ilitarajiwa kukabidhiwa urais wa jumuiya hiyo kutoka kwa Guinea ya Ikweta, kama inavyobainishwa katika kifungu cha sita cha mkataba wa CEEAC. Hata hivyo, hatua hiyo ilipingwa na DRC.
Wizara ya Mambo ya Nje (MINAFFET) ilieleza kuwa:
“Rwanda ilishalalamikia jambo hili kwa barua kwa Mwenyekiti wa Umoja wa Afrika, ikilaani kuachwa kando kwa njia isiyo halali wakati wa mkutano wa 22 uliofanyika Kinshasa mwaka 2023 chini ya uongozi wa DRC. Kimya na kutokuchukua hatua kulikofuata ni uthibitisho wa kushindwa kwa jumuiya hiyo kufuata sheria zake.”
Taarifa iliendelea kusema:
“Rwanda inapinga vikali ukiukwaji wa haki zake ambazo zimeainishwa katika katiba ya CEEAC. Kwa hivyo, haina sababu ya kuendelea kuwa sehemu ya jumuiya inayoendeshwa kinyume na kanuni zake.”
Uamuzi huu umetangazwa baada ya mkutano wa mawaziri wa mambo ya nje uliofanyika Alhamisi mjini Malabo, ambapo Waziri wa Uhusiano wa Kikanda wa Guinea ya Ikweta, Lucas Abaga Nchama, alikutana na wawakilishi wa Rwanda na DRC kujadili mvutano wa muda mrefu kati yao.
Kutokana na migogoro kati ya mataifa hayo mawili, DRC ilipinga Rwanda kuchukua nafasi ya uongozi wa jumuiya hiyo. Rwanda ilikuwa tayari imeonya kuwa ikizuiwa, inaweza kujiondoa — huku DRC pia ikitishia kujiondoa iwapo Rwanda ingetwaa uongozi.
Hadi sasa, Sekretarieti ya CEEAC wala Umoja wa Afrika hawajatoa tamko rasmi kuhusu uamuzi wa Rwanda.
CEEAC ilikuwa na wanachama 12: Angola, Congo-Brazzaville, DRC, Cameroon, Gabon, Chad, Guinea ya Ikweta, Jamhuri ya Afrika ya Kati, Rwanda, Burundi na São Tomé & Príncipe.
