Ikipe y’Igihugu ya Sénégal, Les Lions de la Teranga, yageze ku mukino wa nyuma w’Igikombe cya Afurika cy’ibihugu kiri kubera muri Caméroun itsinze Les Etalons ya Burkina Faso ibitego 3-1.
Hari mu mukino wa 1/2 cy’irangiza wabereye kuri Stade ya Ahmadou Ahidjo i Yaoundé.
Waranzwe no gusatirana gukomeye ku mpande zombi, gusa Sénégal ikarusha Burkina Faso kubona uburyo bukomeye bwinshi bw’ibitego.
Igice cya mbere cy’umukino cyarangiye amakipe yombi anganya 0-0.
Ni igice Sénégal yagiye ibonamo amahirwe yo kubona Penaliti ebyiri, gusa zombi umusifuzi aza kuzanga nyuma yo kwiyambaza VAR.
Byasabye umunota wa 70 w’umukino ngo Sénégal ifungure amazamu ibifashijwemo na Abdou Diallo, mbere y’uko Idrissa Gana Gueye ayitsindira igitego cya kabiri ku munota wa 76.
Burkina Faso yishyuye kimwe muri biriya bitego ku munota wa 82 w’umukino biciye kuri Blati Touré, mbere y’uko Sadio Mané atsindira Sénégal agashinguracumu mu minota ya nyuma y’umukino.
Ni ku nshuro ya gatatu Sénégal yageze ku mukino wa nyuma w’Igikombe cya Afurika, ndetse n’iya kabiri yikurikiranya dore muri 2019 na bwo yari yawugezeho gusa igatwarwa igikombe itsinzwe na Algérie igitego 1-0.
Sénégal izahurira ku mukino wa nyuma ku Cyumweru n’imwe hagati ya Caméroun na Misiri zihurira mu mukino wa 1/2 cy’irangiza kuri uyu wa Kane.
