Urukiko rwo muri Somalia kuri uyu wa 24 Kanama 2020 rwakatiye abakozi bane bo muri Minisiteri y’Ubuzima igifungo kiri hagari y’imyaka 9 na 18 bazira kunyereza inkunga igihugu cyagenewe mu kurwanya icyorezo cya Covid-19.
Ku isonga hari Umuyobozi Mukuru w’iyi Minisiteri, Abdullahi Hashi Ali wakatiwe igifungo cy’imyaka 9, acibwa n’ihazabu y’amadolari y’Amerika 2,366.
Abandi ni Mohamud Bule Muhamud wari ishami ry’imiyoborere n’imari (yakatiwe igifungo cy’imyaka 18), Mahdi Abshir ushinzwe ibaruramari (yakatiwe igifungo cy’imyaka 12), na Bashir Abdi ushinzwe ishami rirwanya SIDA na Malaria, uyu yakatiwe igifungo cy’imyaka itanu.
Buke Muhamud na Mahdi Abshir nabo baciwe ihazabu y’amadolari y’Amerika 2,366, naho Bashir Abdi acibwa 1183. Aba bose kandi bambuwe uburenganzira bwo kuzongera gukora mu nzego za leta.
Nk’uko igitangazamakuru Hiiraan dukesha iyi nkuru cyabitangaje, aba bayobozi bose batawe muri yombi muri Mata 2020, nyuma yo gutahurwa ko banyereje akayabo k’amafaranga yagenewe kurwanya iki cyorezo.
Kuva icyo gihe bari bagifunzwe gusa hari abandi bagenzi babo batanu barekuwe nyuma y’aho bigaragaye ko icyaha kitabahama.
