Perezida wa Somalia, Mohamed Farmaajo, yatangaje ko yababajwe n’urupfu rwa Gen Mohamed Nur Galal uri mu baguye mu gitero umutwe wa Al Shabab wagabye kuri hoteli iri mu murwa mukuru Mogadishu.
Abantu 10 ni bo bimaze kumenyekana ko baguye muri kiriya gitero cy’ibiturika cyakurikiwe no kurasana, cyabaye ku Cyumweru nimugoroba, nk’uko byatangajwe n’umuvugizi wa Polisi ya Somalia.
Umutwe wa Al Shabab wahise wigamba ko ari wo wagabye kiriya gitero cyifashishije imodoka itwaye ibintu biturika ikinjira ku ngufu muri hoteli mbere yo guturika.
Abarwanyi ba Al-Shabaab bamwe bahise bafata iyi hoteli, mbere y’uko ingabo za Somalia zerekezayo kurwana na bo.
Perezida Farmaajo kuri Twitter yatangaje ko mu bapfuye harimo umugabo wahoze ari jenerali mu ngabo za Somalia.
Ati: “Imana igirire impuhwe abanya-Somalia baguye muri iki gitero cya kinyamaswa, ndihanganisha abababajwe n’urupfu rwa jenerali Mohamed Nur Galal, wahoze mu ngabo za Somalia”.
Reuters yavuze ko kuri uyu wa Mbere ingabo za leta ya Somalia zatsinze abarwanyi ba Al Shabab bari bahise bigarurira iyi hoteli.
Umuvugizi wa Polisi ya Somalia, Sadik Ali yavuze ko “Kurwanya abagabye igitero byarangiye. Abantu icyenda bapfuye harimo bane bari mu bagabye igitero, n’abasiviri 10 barakomereka.”
Hoteli yagabweho kiriya gitero izwiho kuba ari imwe mu zikunze guhuriramo abantu bo mu butegetsi bwa Somalia.
Al Shabab irwanya ubutegetsi bwa Somalia, ikunze gukora ibikorwa nk’ibi by’ubwiyahuzi mu gutera no kwica abo mu butegetsi bw’igihugu, ndetse ibi bikorwa ikaba inabikorera no mu bihugu bituranye na yo.
