Uwahoze ari umudamu w’umukuru w’igihugu muri Sri Lanka, Shiranthi Rajapaksa, yatawe muri yombi azira ibirego bivuga ko umuryango utabara imbabare ufitanye isano na we wakoresheje nabi impano zari zakusanyirijwe ibitaro by’abana.
Kuri uyu wa Gatatu, abayobozi bashinzwe kurwanya ruswa bataye muri yombi uyu mugore w’imyaka 73 w’uwahoze ari Perezida wa Sri Lanka, Mahinda Rajapaksa, afatiwe mu rugo rwabo ruri mu murwa mukuru, Colombo.
Barimo kumuhata ibibazo ku mafaranga arenga miliyoni 10 z’Ama-Rupees ($ 30.300; £ 22.800) y’impano yakusanyijwe n’umuryango utabara imbabare, Siriliya Saviya, yari agenewe gukoreshwa mu kugura scanner yihariye y’ibitaro by’abana bya Lady Ridgeway Children's Hospital.
Ariko, abayobozi bavuga ko iyo scanner yari yaramaze gutangwa na Guverinoma y'u Bushinwa nk’impano nk’uko inkuru dukesha BBC ikomeza ivuga.
Shiranthi Rajapaksa yahakanye amakosa yose avuga ko amafaranga atakoreshejwe nabi.
Ku wa Mbere, nibwo yasubiye muri Sri Lanka avuye muri Singapore, aho yari ari kwivuriza. Yari yatanze ubusabe mu rukiko kugira ngo agerageze kubuza itabwa muri yombi rye, ariko biteganyijwe ko azaburanishwa ku itariki ya 12 Ukwakira.
Manoj Gamage, Umuvugizi wa Mahindra Rajapaksa wahoze ari pererezida, yatangaje ko amafaranga afite umutekano kuri konti ya Siriliya kandi ko nta buriganya bwabayeho.
Mahinda Rajapaksa yabaye Perezida wa Sri Lanka kuva mu 2005 kugeza 2015 kandi mu myaka myinshi, umuryango we wakomeje kugira ijambo muri politiki y’igihugu.
Yashimwe na benshi nk'intwari kubera ko yarangije intambara y'abenegihugu yari imaze hafi imyaka mirongo itatu ubwo inyeshyamba za Tamil Tiger zatsindwaga mu 2009, muri manda ye ya mbere.