Muri Sudani, urukiko rushinzwe kurwanya iterabwoba muri Port Sudan, ku wa Gatatu, itariki ya 18 Ugushyingo, rwahanishije igihano cy'urupfu, adahari, Umuyobozi w’umutwe wa Rapid Support Forces (RSF), Mohamed Hamdan Dagalo, uzwi ku izina rya "Hemetti", hamwe n'abavandimwe be babiri, Abdelrahim na Al-Kouni, n'abandi bayobozi b’ingabo cumi n’umwe. Abaregwa bose hamwe, cumi na bane bahamijwe icyaha.
Nk'uko urukiko rubivuga, icyemezo cyafashwe mu rwego rw’ibyaha by'intambara birimo gusenya, gusahura no kwangiza inyubako n'ibigo by'ubuvuzi muri Sudani. Urukiko kandi rwategetse abahamwe n'icyaha kwishyura indishyi nini, zingana na miliyari 40 z'amadolari (hafi miliyari 36.5 z'amayero) nk'uko inkuru dukesha RFI ivuga.
Iki ni cyo gihano cy’urupfu cya kabiri gitanzwe kuri Mohamed Hamdan Dagalo, abavandimwe be, n’abayobozi b’ingabo ze muri RSF. Igihano cya mbere cyatanzwe muri Nyakanga umwaka ushize n’uru rukiko n’ubundi, mu rwego rw’iyicwa ry’uwahoze ari Guverineri wa Darfur y’Iburengerazuba, Khamis Abdullah Abkar.
Nk’uko ibiro by’ubushinjacyaha, bihagarariwe na Komite y’Igihugu ishinzwe iperereza ku byaha n’ihonyorwa ry’uburenganzira bwa muntu bivuga, “iperereza ryimbitse” ryatumye bishoboka gukusanya ibimenyetso byose bikenewe mbere y’uko urubanza rwoherezwa mu bucamanza.

