Abategetsi ba Sudani bafite icyicaro muri Port-Sudan kuva intambara y’abenegihugu yatangira, bahamagaje ambasaderi wabo muri Kenya nk’uko byatangajwe na Minisiteri y’Ububanyi n’Amahanga ejo, ku wa Kane, itariki 20 Gashyantare, ivugana n’Ibiro Ntaramakuru SUNA.
Iki cyemezo gikurikira inama bivugwa ko yabereye i Nairobi muri iki cyumweru yari igamijwe gushyiraho guverinoma ibangikanye n’iya Sudani. Umushinga watangijwe na General Hemedti, Umuyobozi w’Umutwe wa Rapid Support Forces (RSF) uri mu ntambara n’Ingabo za Sudani. Minisiteri y’ububanyi n’amahanga ya Sudani yamaganye icyo yise “igikorwa gishya kibi cya Kenya”.
Minisiteri y’ububanyi n’amahanga ya Sudani ivuga ko Perezida wa Kenya, William Ruto, “ashishikariza umugambi mubisha ugamije gushyiraho guverinoma y’umutwe w’abajenosideri.»
Port Sudan iramagana inkunga ya Nairobi idahwema gutera RSF. Iri tangazo ryakomeje rigira riti: “Nairobi rero yabaye kimwe mu bigo nyamukuru by’ibikorwa bya politiki, imari n’ibikoresho by’inyeshyamba.” Ku bayobozi ba Sudani, William Ruto rero yigurishije “ku baterankunga bo mu karere ba RSF.»
Ntabwo ari ubwa mbere Port-Sudan ihamagaje ambasaderi wayo. Abategetsi ba Sudani bari barabikoze muri Mutarama 2024, nyuma y’uko William Ruto yakiriye Gen. Hemedti i Nairobi.
Ku munsi w’ejo mu itangazo rigenewe abanyamakuru, Minisiteri y’ububanyi n’amahanga ya Kenya yatangaje ko izo nama z’akazi z’abahagarariye Sudani ku butaka bwayo ziri mu rwego rw’ubwunzi.
Ibintu bitashoboye kumvikana neza, haba mu rwego rw’igihugu ndetse no mu mpuzamahanga. Ku munsi w’ejo, Umuvugizi w’Umunyamabanga Mukuru w’Umuryango w’Abibumbye yasabye kwitondera iyi ntambwe avuga ko ishobora kurushaho “gucamo ibice igihugu.»
