Igihugu cya Tanzania cyatangaje ko kidateganya gutumiza inkingo za Covid-19, ahubwo izakoresha ibyatsi byo mu gihugu ikomeje gukoraho ubushakashatsi.
Gerald Chami, umuvugizi wa minisiteri y’ubuzima muri Tanzania, yabwiye The East African ko bafite impungenge ku nkingo zitumizwa mu mahanga bibaza niba nta bibazo ziteza ku buzima kandi niba ari ingirakamaro.
Bwana Chami yatangaje ko izo nkingo zakozwe mu buryo bwihuse cyane ku buryo zitaba zarageragejwe neza nk’uko iyi nkuru dukesha BBC ivuga.
Igerageza ry’inkingo za Covid-19 ryubahiriza ibisabwa bikomeye byo ku rwego mpuzamahanga.
Iyi nkuru ikaba ivuga ko imyitwarire ya Tanzania kuri Covid-19 itandukanye cyane n’iy’ibindi bihugu bituranye nayo, mu gihe cya vuba gishize byongeye kugira ubwiyongere bw’ubwandu bushya.
Nko guhera mu mpera z’ukwezi kwa kane, Leta ya Tanzania yahagaritse gutangaza imibare mishya ijyanye na Covid-19, ndetse mu kwezi kwa gatandatu Perezida John Magufuli avuga ko iyo virusi itakirangwa mu gihugu.
